Gujarati News

સુરત, તા. ૬ : રાજ્યમાં વિવિધ મનપાની ચૂંટણી માટે ભાજપ દ્વારા સત્તાવાર રીતે ઉમેદવારોની જાહેરાત કર્યાના બે દિવસ પછી પણ ટિકિટ ફાળવણીને લઈને ઉઠેલો વિવાદ શમવાનું નામ નથી લેતો. સુરત, વડોદરા અને જામનગર સહિતના શહેરોમાં કાર્યકર્તાઓ રસ્તા પર ઉતરીને નારાજગી દર્શાવી રહ્યા છે. કેટલીક જગ્યાએ તો મોટા પ્રમાણમાં રાજીનામા પણ પડ્યા છે. તો કેટલાક કાર્યકર્તાઓએ વર્ષોથી પક્ષ માટે કામ કરતા હોવા છતા પોતાની ઉપેક્ષા થતી હોવાનો આરોપ મૂકીને ચૂંટણીમાં પક્ષ વિરુદ્ધમાં કામ કરશે તેવો હુંકાર પણ ભર્યો છે.

સુરતમાં કેટલાક વોર્ડમાં ભારે વિરોધ ઉઠ્યો છે. લિંબાયતના વોર્ડ નં- ૨૮ અને ૨૯ના કાર્યકરોએ સ્થાનિક ઉમેદવાર બનાવવાની રજૂઆત કર્યા બાદ મોટી સંખ્યામાં કાર્યકરો ભાજપ કાર્યાલય ખાતે રાજીનામા આપવા પહોચ્યા હતા. કાર્યકરોએ સુત્રોચાર સાથે વિરોધ પ્રદર્શન કયું હતું. મોટી સંખ્યામાં કાર્યકરોના ટોળાના પગલે રોડ પર ટ્રાફિક જામ સર્જાયુ હતું. પોલીસ બંદોબસ્ત ગોઠવી દેવામાં આવ્યો હતો.

સુરતમાં વોર્ડ નંબર ૨૬ માં ભડકો જોવા મળ્યો છે. સુરતમાં વર્ષોથી કામ કરતા કાર્યકરોને નજર અંદાજ કરાયા છે તેવું તેમનું કહેવું છે. ત્યારે આ કાર્યકર્તાઓએ ભાજપના વિવિધ પદો પરથી રાજીનામા આપ્યા છે. તેમની સાથે ૧૦૦ થી વધુ લોકોએ રાજીનામાં આપ્યા છે. 'ટિકિટ નહિ તો મત નહિલ્લ તેવી માંગણી સાથે તેઓએ વિરોધ દર્શાવ્યો છે. બીજી તરફ વડોદરા મહાનગરપાલિકાની ચૂંટણી માટે ભાજપ દ્વારા ઉમેદવારોની યાદી જાહેર થતાંની સાથે જ ભાજપામાંથી રાજીનામા પડવાની શરૂઆત થઇ ગઇ છે. વોર્ડ નંબર-૧૮માં વોર્ડ પ્રમુખની ટિકીટ કાપવામાં આવતા વોર્ડ પ્રમુખના સમર્થનમાં ૯૦ જેટલા કાર્યકરોએ ભાજપામાંથી રાજીનામા આપી દીધા હતા. હજી વધુ રાજીનામા મૂકાય તેવી શક્યતાઓ છે. આ ઉપરાંત વોર્ડ નંબર ૧, ૩, ૭, ૧૫ અને ૧૬માં વર્ષોથી કામ કરતા કાર્યકરોને ટિકીટ આપવામાં ન આવતા કાર્યકરોમાં ભારે રોષ ભભૂકી ઉઠ્યો છે. કાર્યકરોએ ચૂંટણીનો બહિષ્કાર કરવાની ચીમકી ઉચ્ચારી હતી.

આ તરફ જામનગરમાં પણ ઉમેદવારોની યાદી જાહેર થયા બાદ સતત રાજીનામા પડી રહ્યા છે. ગુરુ અને શુક્ર બે દિવસમાં અનેક રાજકીય આગેવાનોના રાજીનામાથી ભાજપ માટે જામનગર મહાનગરપાલિકામાં આ વખતે ચૂંટણી કપરાં ચઢાણ બની શકે છે. ગુરૂવારે પૂર્વ ડેપ્યુટી મેયર કરશન કરમુરે રાજીનામું આપી શરૂઆત કર્યા બાદ શુક્રવારે વધુ બે વર્તમાન અને પૂર્વ શહેર પ્રમુખ તેમજ પૂર્વ કોર્પોરેટરે રાજીનામું આપી દેતાં ભાજપમાં ભાગાભાગીનો દોર શરૂ થઈ ગયો છે હજુ પણ અનેકના રાજીનામા પડવાની સંભાવનાઓ દર્શાવવામાં આવી રહી છે.