Gujarati News

લંડન, તા.૩: કોરોના વાઇરસને લીધે ઇંગ્લેન્ડ એન્ડ વેલ્સ ક્રિકેટ બોર્ડ (ઇસીબી)એ પોતાના કર્મચારીઓના પગારમાં કાપ મૂકયો છે. સેન્ટ્રલ કોસ્ટમાં ઘટાડો કરવા અને લાંબા ગાળા માટે નોકરીઓ બચાવવાના ભાગરૂપે આ કાપ મૂકવામાં આવ્યો છે. દરેક કર્મચારીઓ સાથે ચર્ચા કર્યા બાદ આ કાપ પહેલી એપ્રિલથી મે મહિના માટે લાગુુ કરવામાં આવ્યો છે.

પગારમાં મુકાનારો આ કાપ કર્મચારીઓના જોબ-ગ્રેડના આધારે રહેશે જે તેમના પગારના ૧ થી ૨૫ ટકા સુધી રહેશે. એકિઝકયુટિવ મેનેજમેન્ટ ટીમ અને બોર્ડના પગારમાં ૨૦ ટકા, જયારે ચીફ એકિઝકયુટિવ ઓફિસર ટોમ હેરિસને પોતાના પગારમાં ૨૫ ટકા કાપ મૂકવાનો સ્વૈચ્છિક નિર્ણય લીધો છે. આ ઉપરાંત ઇસીબીએ ૨૦૨૦ની બધી નવી ભરતી પર પણ રોક મૂકી દીધી છે. ઇંગ્લેન્ડના ક્રિકેટ જગત સાથે સંકળાયેલા લોકોને મદદ કરવા ઇસીબીએ તાજેતરમાં ૫.૭૫ અબજ રૂપિયાની મદદ કરવાની જાહેરાત કરી છે.