Gujarati News

રાજકોટ ડેરીની ચૂંટણીમાં કેબીનેટ મંત્રી જયેશ રાદડિયા પ્રેરિત પેનલના ઉમેદવારો ગોવિંદભાઇ રાણપરિયા, ગોરધનભાઇ ધામેલિયા વગેરેએ ઉમેદવારી પત્ર રજુ કરેલ તે પ્રસંગની તસ્વીર આ પ્રસંગે જિલ્લા ભાજપ પ્રમુખ ડી.કે. સખિયા સહિતના અગ્રણીઓ ઉપસ્થિત રહ્યા હતા. (તસ્વીર સંદિપ બગથરીયા)

રાજકોટ તા. ૧૦ : જિલ્લા સહકારી દૂધ ઉત્પાદક સંઘ (રાજકોટ ડેરી) ના સંચાલક મંડળની ૧૩ બેઠકો માટે તા. ર૮મીએ ચૂંટણી યોજાનાર છે. જેમાં આજે જયેશ રાદડિયાની પસંદગીની ગોવિંદભાઇ  રાણપરિયાની પેનલ ઉમેદવારી કરી છે. વર્તમાન ચૂંટાયેલા ૧૩ સભ્યો પૈકી માત્ર ચેરમેન ગોવિંદભાઇ અને જયોત્સનાબેન ગઢિયા સિવાઇના તમામને પડતા મૂકી ૧૧ નવા ચહેરાઓને સ્થાન આપ્યું છે જયેશ રાદડિયાએ પેનલ પસંદગીથી જ આગમના એંધાણ આપી દીધા છે. ડેરીની તમામ અથવા મોટાભાગની બેઠકો બિનહરીફ કરાવવા પ્રયાસો છે.

ડેરીમાં આવતીકાલે ફોર્મ ભરવાનો છેલ્લો દિવસ છે.તા.૧૩મીએ ફોર્મ ચકાસણી થશે. તે જ દિવસે માન્ય ઉમેદવારોની યાદી પ્રસિદ્ધ થશે. તા.૧૪મીથી તા.૧પમી સુધી ફોર્મ પાછા ખેંચવાનો સમય છે. તા.૧૮મીએ હરીફ ઉમેદવારોની આખરી યાદી પ્રસિદ્ધ થશે. જરૂર પડે તો તા.ર૮મીએ સવારે ૯ થી ૪ ચૌધરી હાઇસ્કુલ ખાતે મતદાન અને બીજા દિવસે સવારે ૯ વાગ્યાથી તેજ સ્થળે મત ગણતરી થશે.

રાજકોટડેરીમાં રાદડિયા પેનલમાં માત્ર બે હાલના સભ્યો છે. બાકીના તમામ નવાને સ્થાન અપાયું છે જયેશે રાદડિયાએ તાલુકાવાર પ્રવાસ કરી ઉમેદવાર પસંદ કર્યા છે. ૧૩ પૈકી ૮ પુરૂષ ઉમેદવારો અને પ મહિલા ઉમેદવારો છે. રાદડીયા પ્રેરિત ઉમેદવાર સિવાય કેટલાક ઉમેદવારો પણ ફોર્મ ભરવા આગળ આવી રહ્યાનું જાણવા મળે છે.(૯.૧૭)