Gujarati News

રાજકોટ તા. ૩૧ : રાજકોટ જિલ્લા કલેકટર શ્રી રેમ્યા મોહને આજ સવારથી મીટીંગોનો દોર શરૂ કરી દીધો છે.

'અકિલા' સાથેની વાતચીતમાં તેમણે જણાવ્યું હતું કે, આજે બપોરે ૧૨ વાગ્યાથી રાજકોટ શહેર - જિલ્લામાં ૧૭ જેટલા કોરોનટાઇન સેન્ટરો, હોમ કોરોનટાઇન કરેલ લોકો અને વિસ્તાર, તે ઉપરાંત દવા, માસ્ક, સેનીટાઇઝર, જીવન જરૂરીયાતની ચીજવસ્તુઓ, દૂધ, શાકભાજી અને વસ્તુઓના ઉત્પાદન માટે અપાયેલ મંજૂરી આ તમામનો રિવ્યુ લેવાઇ રહ્યો છે, આ માટે સીપી, ડીસીપી, મ્યુ. કમિશ્નર, ડીડીઓ, આરોગ્ય અધિકારીઓ, દરેક પ્રાંત, મામલતદારને બોલાવ્યા છે, આ તમામના વિસ્તારોમાં ઉપરોકત વસ્તુઓ લોકો - મજૂરોની સ્થિતિ શું છે, તેની વિગતો માંગી છે, કોઇ મુશ્કેલી હશે, કચાશ હશે તો તુર્ત જ સૂચના આપી નિર્ણય લઇ દૂર કરાશે.

કલેકટરે જણાવેલ કે, પૂરતો જથ્થો છે, બધુ ગોઠવાઇ ગયું છે, તો પછી એકપણ વસ્તુની ફરિયાદ ન આવવી જોઇએ, જો ફરિયાદ હોય તો તાકિદે દૂર કરો, નાનામાં નાના માણસ સુધી જાવ, હવે દરેક વિસ્તાર દીઠ જે તે અધિકારીની જવાબદારી ફિકસ કરી છે, કોઇ ગંભીર કચાશ રહેશે તો તુર્ત જ પગલા લેવાશે.

તેમણે જણાવેલ કે, હોમ કોરોનટાઇન કરેલ એક પણ વ્યકિત બહાર ન નીકળે, નહી તો હવે પગલા આવશે, તંત્રની પણ ધીરજની એક મર્યાદા હોય છે, લોકો સહકાર આપે, આપણે હજુ બે અઠવાડિયા કાઢવાના છે, લોકો સમજે.

તેમણે જણાવેલ કે, કાલથી રેશનીંગ - સસ્તા અનાજની દુકાનો ઉપરથી બીપીએલ, એનએફએસએ - અત્યોંદય કાર્ડ હોલ્ડરોને ટોકન સિસ્ટમ મુજબ તમામ ચીજવસ્તુના પુરવઠાનું વિનામૂલ્યે વિતરણ શરૂ થઇ જશે, એપીએલ કાર્ડ હોલ્ડરોને સરકારે નક્કી કરેલા ભાવ મુજબ અપાશે.