Gujarati News

અમદાવાદ, તા.૨૭: મોદી સરકારે જાહેર કરેલા ૨૧ દિવસના લોકડાઉનથી સ્મોકિંગની આદત હોય તેવા લોકો મુશ્કેલીમાં મુકાઈ ગયા છે. તેમની પાસે સિગારેટનો સ્ટોક હવે ખતમ થઈ રહ્યો છે. જયારે ૨૧ દિવસના લોકડાઉનના કારણે રાજયભરમાં પાનના ગલ્લાઓ બંધ કરી દેવાયા છે. આ કારણે સ્મોકર્સ હવે સિગારેટ માટે વલખા મારી રહ્યા છે. હવે તેઓ ઉંચી કિંમત ચૂકવીને બ્લેકમાં તેને ખરીદવા મજબૂર થયા છે.

અમદાવાદના એક વેપારી શરદ શર્મા કહે છે, 'રાજય સરકારે ચાર મુખ્ય શહેરોમાં લોકડાઉન જાહેર કર્યું ત્યારે મેં સિગારેટના અમુક પેકેટ્સનો સ્ટોક કરી રાખ્યો હતો, પરંતુ તેને ૩૧ માર્ચ બાદ દુકાનો ખુલી જશે તે આશા સાથે રાખ્યો હતો. જોકે હવે મને લાગે છે કે મારી પાસે બે અઠવાડિયાથી વધારે દિવસનો સ્ટોક નથી રહ્યો. મેં રોજની ૧૦ સિગારેટમાંથી ૩ સિગારેટ ઓછી કરી નાખી છે.'

ગલ્લાવાળાના કહેવા મુજબ મોટાભાગના લોકોએ એડવાન્સમાં જ સિગારેટનો સ્ટોક કરી રાખ્યો હતો. શહેરમાં પાનનો ગલ્લો ધરાવતા પરેશ ચૌહાણ કહે છે, પાનના ગલ્લા બંધ કરવાથી નુકસાન તો થયું છે, પરંતુ લોકડાઉનના કારણે દરેક બિઝનેસમાં નુકસાન થઈ રહ્યું છે. અમારા મોટાભાગના કાયમી ગ્રાહકોએ શટડાઉન પહેલા સિગારેટનો સ્ટોક ખરીદીને રાખ્યો હતો.

સુરતના વેપારી અભિષેક અમિન કહે છે, મેં પહેલાથી જ લાંબા લોકડાઉનની ગણતરી રાખી હતી. આથી મેં એક મહિનાની સિગારેટ સ્ટોકમાં રાખી હતી અને હાલમાં તેને વાપરું છું, પરંતુ મને નથી ખબર કે આ લોકડાઉન હજુ કેટલું આગળ જઈ શકે છે.

માર્કેટમાં સિગારેટની ડિમાન્ડ વધતા બ્લેક માર્કેટમાં તે ૩૫ થી ૫૦ ટકા વધારે કિંમતે વેચાઈ રહી છે. શહેરના એક પ્રોફેશનલ આશિષ નારાયણ કહે છે, હું સિગારેટનો બંધાણી છું અને તેના વિના રહેવું મારા માટે મુશ્કેલ છે. મેં મારા ઘર નજીક દુકાન ધરાવતા વ્યકિતને બોલાવીને તેની પાસે સિગારેટ માગી હતી, જોકે તે ૫૦ ટકા વધારે કિંમતમાં મને આપવા રાજી થયો હતો.

આ ઉપરાંત ઘણા લોકોએ આ લોકડાઉનને સિગારેટ છોડવા માટેની સારી તક બનાવી લીધી છે. વેજલપુરમાં રહેલી નિરાલી શાહ કહે છે, હું ઘણા સમયથી સિગારેટ છોડવાનો પ્રયાસ કરતી હતી. હું માનું છું કે આ માટે લોકડાઉન કરતા અન્ય કોઈ સારી તક ન હોઈ શકે. હું રોજની ઘણી સિગારેટ પીતી એટલે તે અદ્યરું છે, પરંતુ રવિવારથી મેં તે પીવાનું બંધ કરી દીધું છે અને હું તેમાં સફળ થઈ રહી છું.