Gujarati News

અમદાવાદ તા. ૬ : સામાન્ય રીતે પાસપોર્ટ મેળવવા માટે અરજી કરનાર અરજદારે પોલીસ વેરીફિકેશન માટે જે તે પોલીસ સ્ટેશન જવું પડતું હતું.ગૃહવિભાગે ઈ-ગુજકોપ પ્રોજેકટ અંતર્ગત પોલીસ કર્મચારીઓને મોબાઈલ ફાળવી મોબાઈલ એપનાં માધ્યમથી પોલીસ વેરીફિકેશન અરજદારોનાં ઘેર જઈને કરવાની કામગીરી કરવાનો નિર્ણય કરતાં અરજદારોને હવે પોલીસ સ્ટેશન જવાનો ધક્કો બંધ થયો છે.પોકેટ કોપ મોબાઈલ એપ્લીકેશનથી પેપરલેસ કામગીરીનાં કારણે પોલીસ કર્મચારીઓનાં કામનું ભારણ દૂર થતાં ફીલગુડનો અહેસાસ કરી રહ્યાં છે.

તાજેતરમાં જ રાજય સરકારનાં ગૃહવિભાગે પોલીસ કામગીરીને ડીજીટલ બનાવવા અને પેપરલેસ કરવા માટે ઈ-ગુજકોપ નામની વેબસાઈટ બનાવીને પ્રોજેકટને કાર્યરત કર્યો હતો.આ પ્રોજેકટ અંતર્ગત ડીવાયએસપી તેમજ પોલીસ સ્ટેશનમાં ફરજ બજાવતાં પીઆઈ, પીએસઆઈ અને એલઆઈબીનાં કર્મચારીઓને મોબાઈલ આપવામાં આવ્યા છે.આ મોબાઈલમાં પોકેટ કોપ મોબાઈલ એપ્લીકેશન આપીને તેનાં દ્વારા પાસપોર્ટ મેળવવા ઈચ્છતા અરજદારો માટે પોલીસ વેરીફિકેશનની કામગીરીને સરળ બનાવવામાં આવી છે.

જેમાં અરજદારોને પોલીસ સ્ટેશન આવવા પર રાહત આપીને એલઆઈબીનાં કર્મચારીઓ અરજદારોનાં ઘેર જઈને વેરીફિકેશનની કામગીરી કરશે.અરજદારનાં ઘેર જઈને દસ્તાવેજનાં ફોટા પાડી તેને એપ્લીકેશનમાં અપલોડ કરીને ફોટોગ્રાફ સાથે સબમીટ કરતાં સમગ્ર કામગીરી પેપરલેસ બની ગઈ છે.પાસપોર્ટ માટેની કામગીરી પેપરલેસ થતાં પોલીસ કર્મચારીનાં માથેથી કામનું ભારણ ઓછું થઈને સરળ બની છે.

કેવી રીતે વેરીફિકેશનની  કામગીરી કરાય છે ?

અત્યાર સુધી પોલીસનો એલઆઈબી વિભાગ પાસપોર્ટનું ફોર્મ ડાઉનલોડ કરીને તેનાં ત્રણ ફોર્મ ભરી, ફોરવર્ડીંગ લેટર બનાવી જે તે પોલીસ સ્ટેશન મોકલીને તેની માહીતી ભરીને પરત એલઆઈબી વિભાગમાં મંગાવતા હતા. પરંતુ હવે એલઆઈબી વિભાગ પાસપોર્ટનું ફોર્મ ડાઉનલોડ કરીને જે તે પોલીસ સ્ટેશનનાં ઈન્ચાર્જને મોકલી આપે છે. તે ફોર્મ મેળવ્યા બાદ કર્મચારી અરજદારનાં ઘેર જઈને ફોટો પાડી, દસ્તાવેજો સ્કેન કરી, અરજદાર કોઈ ગુનામાં સંડોવાયેલા છે કે કેમ તેની માહીતી મેળવીને જરૂરી દસ્તાવેજો મોબાઈલથી એલઆઈબીને સબમીટ કરી  સંપૂર્ણ કામગીરી પેપરલેસ થઈ જતાં વેરીફિકેશન કામગીરી ઝડપી બની છે.

એક જ એપમાં ઘણી  બધી સુવિધાઓ મળશે

પોલીસ કર્મચારીઓને ફાળવેલાં મોબાઈલમાં પોકેટ કોપ મોબાઈલ એપ્લીકેશન આપવામાં આવી છે.આ એપમાં પાસપોર્ટ વેરીફિકેશનની સાથે સાથે લેટીટ્યુડ અને લોંગીટ્યુડ ઈન્ટરફેસ, મીસીંગ પર્સન સર્ચ, વ્હીકલ સર્ચ, એમ્પ્લોઈ સર્ચ, એકયુઝડ સર્ચ તેમજ ટ્રાફીક રૂલ્સ અને સાઈન જેવી સુવિધાઓ આપવામાં આવી છે.જેનાં કારણે પોલીસ કર્મચારીઓને અનેક સુવિધાઓ ઓનલાઈન મળી રહેશે.

ઈ-ગુજકોપથી પોલીસને ગુનેગારો શોધવામાં ફાયદો

પાસપોર્ટ વેરીફિકેશન વખતે ઈ-ગુજકોપની પોકેટ કોપ મોબાઈલ એપમાં પોલીસ કર્મચારી જે તે અરજદારનું પુરૂ નામ નાખીને ગુનાની માહીતી અંગે સર્ચ કરશે ત્યારે ગુજરાતમાં રહેતાં તે નામના તમામ અરજદારોની કોઈપણ ગુનો સંબંધી માહીતી ઓટોમેટીક જનરેટ થશે.જેનાં કારણે પોલીસ વિભાગને ગુનેગારોને શોધવા માટે અનેક ફાયદા થશે.