Gujarati News

મુંબઈ:સલમાન ખાન અને શાહરૂખ ખાન બાદ હવે બોલીવુડનો ત્રીજો સુપરસ્ટાર આમિર ખાન પણ નાના પડદા પર પુનરાગમન કરી રહ્યો છે. સલમાન ખાન 16 સપ્ટેમ્બરથી ‘બિગ બૉસ 12’ સાથે પરત ફરી રહ્યો છે. તો શાહરૂખ ખાન આ વર્ષનાં અંતમાં ટીવી શૉ ટેડ ટૉક્સ ઇન્ડિયાની બીજી સીઝન હૉસ્ટ કરવાનો છે. તો હવે આમિર ખાન પણ પોતાના સુપરહિટ શૉ ‘સત્યમેવ જયતે’ની ત્રીજી સીઝન સાથે નાના પડદે પરત ફરી રહ્યો છે. આમિરે આ શૉ માટે તૈયારીઓ પણ શરૂ કરી દીધી છે.સૂત્રોનાં જણાવ્યા પ્રમાણે આ વખતે ‘સત્યમેવ જયતે’ને બે ભાગોમાં રીલીઝ કરવામાં આવશે. શૉ માટે આ વખતે ટોટલ 11 એપિસોડનું શૂટ કરવામાં આવશે. શૉનો પહેલો ભાગ 2019નાં પહેલા ત્રિમાસિક એટલે કે માર્ચની વચ્ચે રીલીઝ કરવામાં આવશે, જેમાં શૉનાં 5 એપિસોડનું પ્રસારણ કરવામાં આવશે. શૉનાં બીજા ભાગને ઑક્ટોબર 2019માં રીલીઝ કરવામાં આવશે, જેમાં શૉનાં 6 એપિસોડનું પ્રસારણ કરવામાં આવશે.સૂત્રોનાં જણાવ્યા અનુસાર ફિલ્મ ‘ઠગ્સ ઑફ હિન્દોસ્તાન’નાં પ્રમોશન બાદ આમિર ‘સત્યમેવ જયતે’ની તૈયારીઓમાં જોડાશે. મુદ્દાઓમાં આ વખતે નેક્સ્ટ જનરેશન, ડિપ્રેશન અને બેરોજગારી જેવી ગંભીર સામાજિક સમસ્યાઓ પર વધારે ફોકસ કરવામાં આવશે.