Gujarati News

નવસારી જિલ્લાના ચીખલી ખાતે જાહેર સભાને સંબોધવા જતા દિલ્હીના મુખ્યમંત્રી અરવિંદ કેજરીવાલ અને પંજાબના મુખ્યમંત્રી ભગવંત માનને ભારતીય જનતા પાર્ટી  સમર્થકો દ્વારા કાળા ઝંડા બતાવવામાં આવ્યા હતા. આ દરમિયાન ભાજપના સમર્થકોએ ‘મોદી-મોદી’ના નારા પણ લગાવ્યા હતા

ચીખલી તાલુકાના ખુડવેલ અને ગોલવાડ ગામો વચ્ચે રસ્તાના કિનારે ઉભેલા ભાજપના સમર્થકોએ આમ આદમી પાર્ટી (આપ) નેતાઓને કાળા ઝંડા બતાવ્યા હતા જ્યારે તેમનો કાફલો ત્યાંથી આ સ્થળોએથી પસાર થતો હતો. ચીખલી શહેરના નેશનલ ક્રિકેટ ગ્રાઉન્ડ ખાતે યોજાનારી રેલીમાં ભાગ લેવા જતા ભાજપના સમર્થકોએ ‘મોદી-મોદી’ના નારા પણ લગાવ્યા હતા. અહીં બંને મુખ્યમંત્રી રેલીને સંબોધવાના હતા.

જો કે, રેલીને સંબોધિત કરતી વખતે આ ઘટનાનો ઉલ્લેખ કરતા કેજરીવાલે કહ્યું કે તેઓ કાળા ઝંડા બતાવનારાઓને પોતાના ભાઈ માને છે. તેમણે વિશ્વાસ વ્યક્ત કર્યો કે એક દિવસ તેઓ (કેજરીવાલ) તેમનું દિલ જીતી લેશે અને તેમને (સમર્થકો)ને પોતાની પાર્ટીમાં સામેલ કરશે.

કેજરીવાલે કહ્યું કે લોકો તેમની પસંદગીની પાર્ટીને મત આપી શકે છે, પરંતુ આપ તેમના બાળકોને મફત અને ગુણવત્તાયુક્ત શિક્ષણ અને તબીબી સંભાળ મળે તે સુનિશ્ચિત કરશે. તેમણે દાવો કર્યો હતો કે ભાજપના સભ્યો પણ ગુજરાત સરકારની વિરુદ્ધ છે અને તેમાંથી ઘણાએ તેમને કહ્યું છે કે તેઓ પાર્ટીને સત્તા પરથી દૂર કરવા માંગે છે. તેમણે ભાજપના કાર્યકરોને અપીલ કરી કે તેઓ તેમની પાર્ટી સાથે રહે પરંતુ આપ પાર્ટીને મત આપે