Gujarati News

ચંદીગઢ,તા. ૨૯ : પંજાબ અને હરિયાણા હાઈકોર્ટે હાલમાં મુસ્‍લિમ મહિલાઓના લગ્નને લઈને એક મહત્‍વની ટિપ્‍પણી કરી છે. પંજાબ અને હરિયાણા હાઈકોર્ટે નિવેદન આપ્‍યુ છે કે, ૧૫ વર્ષ અને તેથી વધુ ઉંમરની મુસ્‍લિમ મહિલા પોતાની સ્‍વતંત્ર ઈચ્‍છા અને સંમતિથી તેની પસંદગીની વ્‍યક્‍તિ સાથે લગ્ન કરી શકે છે અને આવા લગ્ન બાળ લગ્ન પ્રતિબંધ અધિનિયમ, ૨૦૦૬ની કલમ ૧૨ હેઠળ અમાન્‍ય ગણાશે નહીં. ચિલ્‍ડ્રન હોમમાં તેની ૧૬ વર્ષની પત્‍નીની કસ્‍ટડી સામે ૨૬ વર્ષીય જાવેદ દ્વારા દાખલ કરવામાં આવેલી હેબિયસ કોર્પસ અરજી પર સુનાવણી કરતી વખતે કોર્ટે આ ટિપ્‍પણી કરી હતી. કોર્ટે કહ્યું કે, તેમના લગ્ન મુસ્‍લિમ કાયદા મુજબ માન્‍ય છે અને કસ્‍ટડીમાં રહેલી વ્‍યક્‍તિ અરજદાર સાથે કાયદેસર રીતે હોવી જોઈએ.

પંજાબ અને હરિયાણા હાઈકોર્ટે પુનરોચ્‍ચાર કર્યો છે કે ૧૫ વર્ષ અને તેથી વધુ વયની મુસ્‍લિમ મહિલા પોતાની સ્‍વતંત્ર ઈચ્‍છા અને સંમતિથી પોતાની પસંદગીની વ્‍યક્‍તિ સાથે લગ્ન કરી શકે છે અને આવા લગ્ન  બાળ લગ્ન પ્રતિબંધ અધિનિયમ, ૨૦૦૬. કલમ ૧૨ હેઠળ રદબાતલ  ગણાશે નહીં.

આ કેસની વિગત મુજબ હતી  અરજદારની પત્‍ની સાથે તેના લગ્ન બંને પક્ષકારોની સ્‍વતંત્ર ઇચ્‍છાથી થયા હતા અને બંને પક્ષો મુસ્‍લિમ હોવાથી કસ્‍ટડીમાં રહેલી છોકરીની ઉંમર ૧૮ વર્ષથી ઓછી હોય તો પણ લગ્ન માન્‍ય છે. અરજદારે તેની દલીલના સમર્થનમાં યુનુસ ખાન વિરુદ્ધ રાજય હરિયાણા અને અન્‍ય ૨૦૧૪(૩) RCR (ક્રિમિનલ) ૫૧૮ પર આધાર રાખ્‍યો હતો. આ કેસમાં કસ્‍ટડીમાં રહેલી વ્‍યક્‍તિ હાલના સંજોગોમાં બંને પક્ષો મુસ્‍લિમ હોવાના અને લગ્ન કર્યા હોવાના સંજોગોમાં અરજદારને સોંપવો જોઈએ.

બીજી તરફ રાજયએ દલીલ કરી હતી કે, કસ્‍ટડીમાં રહેનાર સગીર હોવાથી અરજી ફગાવી દેવાને પાત્ર છે. તેણે રજૂઆત કરી હતી કે, ૧૮ વર્ષથી ઓછી ઉંમરના હોવાથી તેને ચિલ્‍ડ્રન હોમમાં રાખવામાં આવી હતી. ન્‍યાયાધીશ વિકાસ બહલની સિંગલ બેન્‍ચે, સંબંધિત દસ્‍તાવેજો, કાયદાકીય સત્તાવાળાઓ અને CrPC ની કલમ ૧૬૪ હેઠળ કરવામાં આવેલા  અટકાયત કરેલી યુવતીના  નિવેદનને ધ્‍યાનમાં લીધા પછી,  અટકાયત કરેલી યુવતીને  મુક્‍ત કરવાનો અને અરજદારને તેની કસ્‍ટડી ટ્રાન્‍સફર કરવાનો આદેશ આપ્‍યો.

પંજાબ અને હરિયાણા હાઈકોર્ટે યુનુસ ખાનના નિર્ણય પર ભરોસો મૂક્‍યો અને કહ્યું કે, અરજદાર અને અટકાયતી વચ્‍ચેના લગ્ન માન્‍ય છે, બંને પક્ષ મુસ્‍લિમ છે. તે કેસમાં નિર્ધારિત કાયદાનો ઉલ્લેખ કરીને, કોર્ટે અવલોકન કર્યું કે, હાલના કેસના તથ્‍યો સમાન કાનૂની સિદ્ધાંતોને આધિન હોવા જોઈએ. કોર્ટે નોંધ્‍યું, ‘ઉપરોક્‍ત ચુકાદાનું અવલોકન દર્શાવે છે કે આ કોર્ટની સંકલન બેન્‍ચે ઉપરોક્‍ત ચુકાદામાં જણાવ્‍યું હતું કે મુસ્‍લિમ છોકરીના લગ્ન મુસ્‍લિમોના અંગત કાયદા દ્વારા સંચાલિત છે અને મુસ્‍લિમ કાયદાના સિદ્ધાંતોને આધીન છે.