Gujarati News

અમદાવાદ,તા.૧૮: ડેન્ટિસ્ટ પત્ની અને એરફોર્સમાં વિંગ કમાન્ડરની ફરજ બજાવતાં પતિ વચ્ચે અમદાવાદની ફેમિલી કોર્ટમાં પેન્ડિંગ કેસ સુરત ટ્રાન્સફર કરવાની પત્નીની અરજીને ગુજરાત હાઈકોર્ટે ફગાવી કાઢી છે. હાઈકોર્ટે પત્નીની અરજીને ગુણદોષ વિનાની હોવાનું ગણાવીને રદ કરી છે. જોકે આ સાથે પતિને આદેશ કર્યો છે કે જયારે પણ કોર્ટમાં કેસની સુનાવણી હોય ત્યારે તેની કાર્યવાહી માટે પત્નીને સુરતથી અમદાવાદ આવવા માટે ટ્રેનના ફર્સ્ટ કલાસની ટિકિટનો ખર્ચ આપવાનો સાથે આ ઉપરાંત અમદાવાદમાં સારી હોટેલમાં રોકાણ અને જમવાનો ખર્ચ પણ પતિએ જ ભોગવવો પડશે. જેને લઈને પતિએ સંબંધિત કોર્ટ સમક્ષ સુનાવણીને એક સપ્તાહ પહેલા ખર્ચની રકમ રોકડા અથવા અન્ય કોઈ માધ્યમથી ટ્રાયલ કોર્ટમાં જમા કરવાની રહેશે અને પત્ની પોતાની સગવડ મુજબ આ રકમ ઉપાડી શકશે.

પ્રસ્તુત કેસની વિગત મુજબ આ કપલ એક મેટ્રિમોનિયલ સાઈટ પર એકબીજાના સંપર્કમાં આવ્યું હતું અને લગ્ન કરવાનું નક્કી કર્યું હતું. ૨૦૧૭માં તેમણે લગ્ન કરી લીધા હતા જોકે થોડા સમય બાદ જ તેમની વચ્ચે ખટરાગ શરુ થતા છેલ્લા એક વર્ષથી વધુ સમયથી તેઓ જુદા જુદા રહે છે. પતિએ ફેમિલી કોર્ટમાં છૂટાછેડા માટે અરજી કરી છે અને તેનું પોસ્ટિંગ હાલ બરેલી ઉત્ત્।ર પ્રદેશમાં છે. જયારે પત્નીએ હાઈકોર્ટ સમક્ષ એવી રજૂઆત કરી હતી કે તેના પતિ દ્વારા નિચલી કોર્ટેને એવું કહેવાયું છે કે તેની પત્ની ડેન્ટિસ્ટ ડોકટર છે અને તેની આવક સારી છે. જોકે તેઓ જુદી જુદી જગ્યાએ કામ કરે છે અને તેની આવક એટલી સારી નથી જેટલી પતિ દાવો કરે છે. આ સાથે તેના માતા-પિતા પણ વૃદ્ઘ છે જેઓ વિવિધ માંદગીથી પીડાય છે. આ ઉપરાંત તેને પોતે પણ હાઈ બ્લડપ્રેશર છે. આ તમામ બાબતને જોતા તે અમદાવાદ કોર્ટમાં હાજર રહી શકે નહીં તેથી આ કેસને સુરત ખાતે ટ્રાન્સફર કરવામાં આવે તેવી અરજી કરી હતી.

બીજી તરફ કમાન્ડર પતિ તરફી એવી દલીલ કરવામાં આવી હતી કે તે એરફોર્સમાં વિંગ કમાન્ડર છે અને તેની સેવાની દેશને જરુર છે. તેથી તેના માટે એ શકય નથી કે તે અમદાવાદથી કેસ માટે સુરત આવે. પત્ની વ્યવસાયે ડોકટર છે અને ડેન્ટિસ્ટ તરીકે પ્રેકિટસ કરે છે તેમ છતા પણ પતિ પાસેથી દર મહિને ખાધાકોરાકી માટે રુ. ૧૬,૮૦૦ આપવામાં આવે છે. તેથી આ કેસને હવે અમદાવાદથી સુરત ટ્રાન્સફર કરવાની કોઈ જરુર નથી. એટલું જ નહીં પતિએ જેવી ફેમિલી કોર્ટમાં ડિવોર્સની અરજી ફાઈલ કરી કે તરત જ પત્નીએ ટ્રાન્સફરની અરજી કરી હતી. તેથી તેની આ અરજી ગ્રાહ્ય રાખી શકાય નહીં. આ ઉપરાંત તેની પત્ની એક શિક્ષિત મહિલા છે તે સુરતથી અમદાવાદ ટ્રાવેલ કરી શકવા સક્ષમ છે.

બંને પક્ષોની દલીલ સાંભળ્યા બાદ હાઈકોર્ટે આદેશમાં નોંધ્યું કે અરજદાર મહિલાના માતા પિતા વિવિધ માંદગીથી પીડિતા હોવાના એકમાત્ર ગ્રાઉન્ડ પર કેસને અમદાવાદથી સુરત ટ્રાન્સફર કરી શકાય નહીં. સુપ્રીમ કોર્ટનું પણ સ્પષ્ટ અવલોકન છે કે મેટ્રિમોનિઅલ કેસોની ટ્રાન્સફરની અરજીમાં ઉદાર વલણ દાખવવાની કોઈ જરુર નથી. તેમાં પણ ખાસ કરીને જયારે પતિ ટ્રાવેલિંગ, ફૂડ અને રોકાણો ખર્ચ આપવા તૈયાર હોય પત્નીની અરજી ગ્રાહ્ય રાખવી જોઈએ નહીં. તેથી આ અરજીને ગુણદોષ વિનાની જાણીને રદ કરવામાં આવે છે અને પતિને પત્નીના ટ્રાવેલ, હોટેલ તેમજ ફૂડનો ખર્ચ આપવાનો આદેશ આપવામાં આવે છે.