Gujarati News

રાજકોટઃ પગપાળા દ્વારકા દર્શને જઇ રહેલા પદયાત્રીઓ માટે દર વર્ષની જેમ આ વર્ષે પણ રાજકોટ શહેર તાલુકા પોલીસ દ્વારા કાલાવડ રોડ મોટા મવા નજીક પોલીસ સ્‍ટેશન બહાર સેવા અને સલામતિ કેમ્‍પ શરૂ કરવામાં આવ્‍યો છે. આ કેમ્‍પમાં રહેવા, જમવાની, મેડિકલ સુવિધા છે. ચા-પાણી, ફ્રુટ, જ્‍યુસ અને સરબત પણ અપાય છે. બપોરે અને રાત્રે રોકાણ માટે સુવા-બેસવાની વ્‍યવસ્‍થા છે. અકસ્‍માતના બનાવો ન બને તે માટે હાઇવે સલામતિનું યોગ્‍ય સુચન અપાય છે. તેમજ પદયાત્રીઓના કપડા તથા સામાન પર રેડિયમ રિફલેક્‍ટર લગાવવામાં આવે છે. જેથી વાહન અકસ્‍માત અટકાવી શકાય. ગરમથી બચવા ટોપી અપાય છે. પદયાત્રીઓને જરૂરી મેડિકલ સારવાર મળી રહે તે માટે કેમ્‍પ ખાતે એમ્‍બ્‍યુલન્‍સ, ડોક્‍ટરની ટીમ પણ હાજર રખાય છે. પોલીસ કમિશનરશ્રી રાજુ ભાર્ગવ, સંયુક્‍ત પોલીસ કમિશનરશ્રી સોૈરભ તોલંબીયા, ડીસીપી સુધીરકુમાર દેસાઇ, એસીપી ડો. પાર્થરાજસિંહ ગોહિલ, એસીપી વી. જી. પટેલના માર્ગદર્શન હેઠળ તાલુકા પીઆઇ એમ.આર. ગોંડલીયા, પીએસઆઇ મોરવાડીયા, આર. બી. જાડેજા  અને ડી. સ્‍ટાફની ટીમે આ વ્‍યવસ્‍થા ઉભી કરી છે. સતત ચાર વર્ષથી તાલુકા પોલીસની ટીમ આ સેવા સલામતિ કેમ્‍પનું આયોજન કરે છે.