Gujarati News

રાજકોટ તા. ૨૫: વંથલીના ટીનમસ ગામના કોળી વૃધ્ધ રૂખડભાઇ દાનાભાઇ ઝીંઝુવાડીયા (ઉ.વ.૬૨)નું હિટ એન્ડ રનના બનાવમાં મોત નિપજ્યું છે. રૂખડભાઇ ૨૨મીએ પોતાના પત્નિ સવિતાબેનની દવા લેવા માટે પોતાના ગામથી વંથલી ગયા હતાં. જ્યાં રસ્તો ઓળંગતી વખતે કોઇ કારની ઠોકરે ચડી જતાં ગંભીર ઇજા થઇ હતી.

રૂખડભાઇને વંથલી, જુનાગઢ સારવાર અપાવી રાજકોટ સિવિલ હોસ્પિટલમાં ખસેડાયા હતાં. પરંતુ અહિ ગઇકાલે સાંજે સારવાર દરમિયાન દમ તોડી દેતાં પરિવારમાં શોક છવાઇ ગયો હતો. હોસ્પિટલ ચોકીના રામશીભાઇ વરૂએ કાગળો કરી વંથલી પોલીસને મોકલ્યા હતાં. મૃતક ચાર ભાઇ અને એક બહેનમાં વચેટ હતાં. સંતાનમાં બે પુત્ર અને એક પુત્રી છે. પોતે છુટક મજૂરી કરી ગુજરાન ચલાવતાં હતાં. પત્નિની દવા દર મહિને લેવાની હોઇ જે પુરી થઇ ગઇ હોઇ લેવા માટે વંથલી ગયા હતાં ત્યારે કાર ચાલકે ઉલાળી દીધા હતાં.