Gujarati News

Gujarati News

News of Monday, 21st September 2020

ઝાલાવાડના ધોળીધજા - નાયકા - ભોગાવો-૨ - વડોદ ડેમ ઓવરફલો

(ફઝલ ચૌહાણ દ્વારા) વઢવાણ તા. ૨૧ : વઢવાણ અને લીંબડી તાલુકામાં ઉપરવાસમાં પડેલ ભારે વરસાદને પગલે લીંબડી ભોગાવો નદી-૨ ઉપર આવેલ વઢવાણનો વડોદ ડેમ ઓવરફલો થયો હતો અને ડેમમાં સતત પાણીની આવક વધતાં તંત્ર દ્વારા ડેમનો એક દરવાજો એક ફુટ ખોલવામાં આવ્યો હતો.

જયારે તંત્ર દ્વારા નીચાણવાળા ગામો વળોદ, ઉઘલ, બોડીયા, બલદાણા, સૌકા, લીંબડી, ઉંટડી, ચોકી, ચોરણીયા, પાણશીણા, જાખણ, ખંભલાવ, દેવપરા, કાનપરા સહિતના ગામોને એલર્ટ કરવામાં આવ્યાં હતાં.

જયારે બીજી બાજુ મુળી તાલુકામાં તેમજ ઉપરવાસમાં પડેલ ભારે વરસાદને પગલે નાયકા ડેમ પર ઓવરફલો થયો હતો અને ડેમનું પાણી છોડવામાં આવતાં ધોળીધજા ડેમ પણ ઓવરફલો થયો હતો ત્યારે ચાલુ ચોમાસાની સીઝનમાં સતત ૮મી વખત ઓવરફલો થતાં લોકોમાં આનંદની લાગણી ફેલાઈ જવા પામી હતી.

તંત્ર દ્વારા નીચાણવાળા ગામો જોરાવરનગર, રતનપર, મેમકા, ભડીયાદ, શીયાણી સહિતના ગામોને એલર્ટ કરાયા હતાં. આમ જિલ્લામાં ફરી ઉપરવાસ તેમજ વરસાદને પગલે ડેમોમાં પાણીની નવી આવક થતાં ડેમ ઓવરફલો થયાં હતાં.

(11:36 am IST)