Gujarati News

વિશ્વ પ્રસિધ્ધ સોમનાથમહાદેવ મંદિરમાં અત્યાર સુધી પ્રથમ ચેકપોસ્ટ પાસે ફૂલહાર અને પ્રસાદી વહેંચતા ફેરીયાઓ પાસેથી દર્શનાર્થીઓ ખરીદી કરીને પ્લાસ્ટિકની થેલીમાં મંદિરમાં ધરવા ફુલ,બિલીપત્ર-હાર અને પ્રસાદી લઇ જતાં જેમાં હવે ફેરફાર કરી સોમનાથ ટ્રસ્ટે તમામ ફેરીયાઓ-વિતરકોને વાંસની છાબડી કે નાની ટોપલી વિનામૂલ્યે ઉપલબ્ધ કરાવી છે તેમાંજ આ ફુલહાર-પ્રસાદ મંદિરમાં લઇ જઇ શકાશે.

સોમનાથ ટ્રસ્ટના ટ્રસ્ટી પ્રવિણભાઇ લહેરીના માર્ગદર્શન હેઠળ સોમનાથ ટ્રસ્ટ જનરલ મેનેજર વિજયસિંહ ચાવડાએ જણાવ્યું કે ટ્રસ્ટે સોમનાથ મંદિરપ્લાસ્ટીક-પ્રદુષણ મુકત બને અને વાંસની છાબડી બનાવતા ગરીબ-મધ્યમવર્ગને રોજીરોટી મળે તથા પર્યાવરણ જળવાઇ રહે  તે માટેનો આ અભિનવ પ્રયોગ હાથ ધર્યો છે.

આ છાબડી મંદિરના કાઉન્ટર ઉપર ફુલહાર પ્રસાદી સાથે ભાવપૂર્વક ધરી રાખી મુકવામાં આવશે અને એકઠી થયેલી તે છાબડીઓ ફરી પાછી ફેરીયાઓ-વિતરકોને બહાર પરત અપાશે. જેથી નવા ગ્રાહકોને તે જ ખાલી છાબડીમાં ફૂલહાર મુકી વેંચી શકશે. હવેથી આ વાંસની છાબડી જ વાપરવી પડશે. પ્લાસ્ટિક બીલકુલ વાપરવા નહીં દેવાય.

સોમનાથ મંદિરની આ પહેલની પ્રશંસા થઇરહી છે.