Gujarati News

Gujarati News

News of Monday, 21st September 2020

નામચીન ફિરોઝ સંધીનો ૨૯.૪૨ લાખનો દારૂ ઝડપાયો

રાતે પોણા બે વાગ્યે લોઠડાથી પડવલાના રસ્તે ઇન્ડસ્ટ્રીયલ એરિયાની બાજુમાં 'કટીંગ' વખતે જ આજીડેમ પોલીસ ત્રાટકી : ગોંડલનો હેમારામ રાઠોડ અને રાજકોટનો આનંદસિંહ રાઠોડ પકડાયાઃ ફિરોઝે મંગાવેલા દારૂનું ધવલ સાવલીયા કટીંગ કરાવતો હતોઃ બંનેની શોધખોળ : દારૂ, બોલેરો પીકઅપ, ટુવ્હીલર મળી ૩૩,૭૨,૪૦૦નો મુદ્દામાલ કબ્જે પીઆઇ વી. જે. ચાવડાની બાતમીઃ પીએસઆઇ એમ. ડી.વાળા અને ટીમનો દરોડો

રાજકોટ તા. ૨૧: શહેર અને રૂરલ એરિયામાં નામચીન બુટલેગર તરીકે જાણીતા ફિરોઝ સંધીનો અધધધ ૨૯ લાખ ૪૨ હજારનો વિદેશી દારૂ આજીડેમ પોલીસે 'કટીંગ' વખતે પડકી લીધો છે. મોડી રાતે લોઠડાથી પડવલા ગામ તરફ જતાં રસ્તે દરોડો પાડવામાં આવતાં નાસભાગ મચી ગઇ હતી. પોલીસે દારૂનો જથ્થો ઉપરાંત એક બોલેરો પીકઅપ, એકટીવા મળી કુલ રૂ. ૩૩,૭૨,૪૦૦નો મુદ્દામાલ કબ્જે કરી ગોંડલ, રાજકોટના બે શખ્સોને દબોચ્યા છે. ફિરોઝ અને કટીંગ કરાવનાર ધવલની શોધખોળ હાથ ધરી છે.

જાણવા મળ્યા મુજબ આજીડેમ પોલીસ મથક હેઠળના લોઠડાથી પડવલા ગામ તરફ જતાં રસ્તા પર રચના ઇન્ડસ્ટ્રીયલ એરિયામાં દારૂના જથ્થાનું મોડી રાતે પોણા બે વાગ્યે કટીંગ થઇ રહ્યું હોવાની બાતમી મળતાં પીઆઇ વી. જે. ચાવડા, પીએસઆઇ એમ. ડી.વાળા સહિતનો કાફલો ત્રાટકતાં નાસભાગ મચી ગઇ હતી. પોલીસે બે શખ્સો હેમારામ નેનારામ રાઠોડ (ઉ.વ.૨૨-રહે. રાજહંસ સોસાયટી ગોંડલ-મુળ નીપ્પલ મેઘવાલગલી તા. દેસુરી પાલી-રાજસ્થાન) તથા આનંદસિંહ લક્ષમણસિંહ રાઠોડ (ઉ.વ.૨૮-રહે. રામકૃપા, કુલદેવી ફલેટ નં.૧૦૨-રાજકોટ-મુળ કુંડા તા. સેમારી ઉદયપુર-રાજસ્થાન)ને પકડી લીધા હતાં.

દરોડામાં પોલીસને રૂ. ૨૯,૪૨,૪૦૦નો ૭૩૫૬ બોટલ દારૂ તથા રૂ. ૪ લાખની બોલેરો, ૩૦ હજારનું એકટીવા કબ્જે કર્યા હતાં. ઝડપાયેલા બે શખ્સોની પુછતાછમાં આ દારૂ ફિરોઝ હાસમભાઇ સંધીએ મંગાવ્યાનું અને તેના કહેવાથી રાજકોટનો અન્ય બુટલેગર ધવલ રસિકભાઇ સાવલીયા કટીંગ કરાવવા આવ્યો હતો. દરોડો પડતાં તે ભાગી ગયો હતો.

પોલીસ કમિશનર શ્રી મનોજ અગ્રવાલ, જેસીપી ખુરશીદ અહેમદ, ડીસીપી પ્રવિણકુમાર મીણા, એસીપી એચ. એલ. રાઠોડની સુચના મુજબ પીઆઇ વી. જે. ચાવડા, પીએસઆઇ એમ.ડી. વાળા, હેડકોન્સ. ભરતસિંહ પરમાર, મહેન્દ્રભાઇ પરમાર, પરેશભાઇ સાંગાણી, શૈલેષભાઇ નેચડા, ઉમેશભાઇ ગઢવી, કુલદીપસિંહ જાડેજા, જયપાલભાઇ સહિતની ટીમ પેટ્રોલીંગમાં હતી ત્યારે બાતમી પરથી આ દરોડો પાડવામાં આવ્યો હતો.

ફિરોઝ સંધી અગાઉ પણ શહેર અને રૂરલ પોલીસના હાથે અનેક વખત લાખોના દારૂમાં પકડાઇ ચુકયો છે. ફરી વખત તેનો લાખોનો દારૂ ઝડપાઇ જતાં તેની અને કટીંગ કરાવવા આવેલા ધવલ સાવલીયાની શોધખોળ હાથ ધરવામાં આવી છે.

(3:19 pm IST)
  • ભારત અને ચીન આવતીકાલે સવારે 11 વાગ્યે, ચુશુલ-મોલ્ડોની ચીની બાજુમાં, છઠ્ઠા કોર્પ્સ કમાન્ડર કક્ષાનો સંવાદ યોજશે. મોસ્કોમાં બંને દેશોના વિદેશ મંત્રીઓની બેઠક બાદ આ પહેલી કોર્પ્સ કમાન્ડર બેઠક હશે. MEA ના જોઇન્ટ સેક્રેટરી પણ ઉપસ્થિત રહે તેવી સંભાવના છે. access_time 10:04 pm IST

  • માંડવી તાલુકાના કોડાય ગામ પાસેથી રોયલ્ટી વગર રેતી (ખનીજ) ભરેલા બે ટ્રેકટર તથા એક હાઇવા ડમ્પર ઝડપી પાડતી લોકલ ક્રાઇમ બ્રાન્ચ પશ્ચિમ કચ્છ, ભુજ access_time 6:34 pm IST

  • મહેસાણાના કડી પોલીસ સ્ટેશન દારૂકાંડને કેસમાં મુખ્ય સૂત્રધાર તત્કાલિન PI ઓ.એમ.દેસાઇની ધરપકડ. અગાઉ 2 PSI સહિત કુલ 6ની ધરપકડ થઈ હતી. access_time 10:03 pm IST