Gujarati News

રાજકોટ તા. ર૦ : શહેરના વોર્ડ નં ૧૪માં આવેલ પુજારા પ્લોટ વાળા વોકળાનો તુટેલો પુલ નવો બનાવવા અંગે સ્ટેન્ડીંગ કમીટી ચેરમેન ઉદય કાનગડે વોર્ડ ઇજનેરને સુચનાઓ આપી હતી. અને આ જર્જરીત પુલ હાલ તુર્ત તાત્કાલીક ધોરણે સમારકામ કરાવી સુરક્ષીત કરાવવા પણ સુચનાઓ આપી હતી.

કોંગ્રેસ પ્રવકતા ગજેન્દ્રસિંહ ઝાલા ત્થા કોર્પોરેટર દિલીપ આસવાણીએ આ બાબતે મ્યુ. કમિશનરને ફરીયાદ કરી હતી. જેની જાણ વોર્ડ નં.૧૪માં કોર્પોરેટર અને નવનિયુકત સ્ટેન્ડીંગ કમીટી ચેરમેનને થતા તેઓએ તાત્કાલીક ધોરણે આ ફરીયાદનો નિકાલ કરાવ્યો હતો.

આ અંગે કોંગી પ્રવકતા ગજેન્દ્રસિંહ ઝાલાએ કરેલી ફરીયાદમાં જણાવેલ કે શહેરના વોર્ડ નં. ૧૪માં ભકિતનગર સોસાયટી અને પુજારા પ્લોટને જોડતો જે પુલ હતો તે સંપૂર્ણપણે ધ્વસ્ત થયો છે લાંબા સમયથી જર્જરીત આ પુલ સાવ ભાંગી જતા હાલ ત્યાંથી અવર જવર કરનારા રાહદારીઓ વિદ્યાર્થીઓને ફરજીયાત ૮૦ ફુટ રોડ પર મુખ્ય રસ્તાથી અવર-જવર કરવી પડે છે.

આ વિસ્તાર શૈક્ષણીક ઝોન છે. અને પ થી ૬ સ્કુલોના વિદ્યાર્થીઓ-વિદ્યાર્થીનીઓ અને પોષ્ટ ઓફીસ કામ અર્થે આવતા નાગરીકો માટે આશીર્વાદ રૂપ હતો આ અંગે કોલ સેંટરમાં સુરેશભાઇ કાચા દ્વારા ફરીયાદો કરવા છતા પુલની મરામત કે નવો પુલ થયેલ નથી તો આ બાબતે તાકીદે યોગ્ય કરવા માંગ છે.(૬.૨૭)