Gujarati News

રાજકોટ તા.૭: જેતપુરના પેઢલા ગામે ૩૧ ૪હજાર મગફળીની ગુણીમાંથી ૧૪૦ ગુણીમાં ૩ થી ૯ કિલોની માટી-ધૂળ-માટીના ઢેફા નીકળી પડયા અને આ મહામોટા કૌભાંડમાં પોલીસે ૨૯ની ધરપકડ કરી છે, તે પ્રકરણના તાણાવાણા ગોંડલમાં લાગેલી ભયાનક આગ અને કરોડોની મગફળી સ્વાહા તથા રાજકોટ માર્કેટ યાર્ડમાં ૧૭ કરોડના બારદાનમાં આગ લાગી તે બંને ઘટના સાથે જોડાયેલા હોવાનો સ્પષ્ટ નિર્દેશ આજે પત્રકારો સાથેની વાતચીત દરમિયાન કલેકટરશ્રી રાહુલ ગુપ્તાએ આપતા ખળભળાટ મચી ગયો છે.

કલેકટરશ્રી રાહુલ ગુપ્તાએ સાફ-સાફ કહયું હતું કે રાજકોટ માર્કેટયાર્ડમાં બારદાનમાં આગ લાગી તેનું કનેકશન આજ સાંજ સુધીમાં ખુલી જશે, સાંજ સુધીમાં અનેક ભેદ ખુલશે તેમ નિર્દેશ આપ્યો હતો.

કલેકટરે જણાવ્યું હતું કે પોતે પાંચ-પાંચ કલાકથી જિલ્લા પોલીસની એલસીબી બ્રાંચમાં બેઠા છે, તેમની હાજરીમાં અનેક મહત્વની વિગતો બહાર આવી છે.

કલેકટરે ધડાકો કર્યો હતો કે, જૂનાગઢના થાણેજ ગામની થાણેજ સહકારી મંડળીનો માલ એટલે કે મગફળી પાંચ જગ્યાએ ઉતારાઇ છે. જરૂર પડયે તે તમામ પાંચ સ્થળે ફુલપ્રુફ તપાસ કરાશે.

તેમણે જણાવેલ કે આરોપી મગન ઝાલાવડીયા મગફળી ખરીદતો હતો તેવું પણ બહાર આવ્યંુ છે.

જિલ્લામાં ૨૭૨ ગોડાઉન આવેલા છે, અને પેઢલા પ્રકરણ તથા અન્ય પ્રકરણમાં એક થી વધુ મંડળીની સંડોવણી પણ હોવાનું ફલીત થઇ રહયું છે.

કલેકટરે સ્પષ્ટ પ્રમાણે જણાવ્યું હતું કે, વેર હાઉસના અધિકારીઓની સંડોવણી ખુલી ગઇ છે, શાપર-ગોંડલનું પણ કનેકશન બહાર આવી રહયું છે, જરૂર પડયે હાલ પડેલ તમામ ૩૧ હજાર ગુણીનો જથ્થો ચકાસાશે. અને આ માટે રેવન્યુ કર્મચારીઓને તપાસમાં ઝુકાવાશે, આ માટે ટીમો બનાવવાની કાર્યવાહી શરૂ કરી દેવાઇ છે.

કલેકટરશ્રી રાહુલ ગુપ્તાએ સ્પષ્ટ ઉમેયંર્ુ  હતું કે કૌભાંડમાં મોડસ ઓપરેન્ડી એવી બહાર આવી છે કે, ટેકાના ભાવે ઉત્તમ ગુણવતાવાળી મગફળી ખરીદી આ માલ બારોબાર વેંચી નખાતો અને ત્યારબાદ એક વેપારીને ઉભો કરી બજારમાંથી હલકી ગુણવતાવાળી મગફળી ખરીદાવાતી અને તે મગફળી ગોડાઉનમાં મોકલી દેવાતી.

કલેકટરે ઉમેયંર્ુ હતું કે અત્યાર સુધીમાં કુલ ૨૯ની ધરપકડ થઇ છે.

પેઢલાના ગોડાઉનમાં પડેલી ૩૧ હજાર ગુણી મગફળી માંથી ૧૪૦ ગુણીની તપાસમાં ૩ થી ૯ કિલો સુધી માટી નીકળી પડી છે.

કોઇ રાજકીય કે સરકારનું દબાણ અંગે કલેકટરે ઉમેયંર્ુ હતું કે પોતાની ઉપર કોઇનું દબાણ નથી, હજુ સુધી કોઇનો ફોન આવ્યો નથી, મુખ્યમંત્રી સાથે પણ વાતચીત થઇ નથી.