Gujarati News

 પોલીસની હાજરીમાં કરવા પડ્‍યા અંતિમ સંસ્‍કારઃ અહીં એક વૃદ્ધની અંતિમ ક્રિયા દરમિયાન તેમના સાત દીકરાઓ વચ્‍ચે બોલાચાલી થઈ ગઈ હતી, વાત મારપીટ સુધી પહોંચી ગઈ હતીઃ સ્‍મશાન ઘાટ પહોંચીને પણ તેઓ લડયા હતાઃ આખરે કંટાળીને તેમના સ્‍વજનોએ પોલીસને બોલાવી હતી

બલ્લભગઢ, તા.૫: હરિયાણા રાજયના છાંયસા વિસ્‍તારના નરિયાળા ગામમાં બુધવારના રોજ ભારે હોબાળો જોવા મળ્‍યો હતો. ૮૫ વર્ષીય એક વૃદ્ધના મૃત્‍યુ પછી તેમના સાત દીકરાઓ વચ્‍ચે એવી તો લડાઈ થઈ કે મારપીટ સુધી વાત પહોંચી ગઈ. મૃતદેહને સ્‍મશાન ઘાટ સુધી લઈ જતી વખતે રસ્‍તામાં ૩ વાર મારપીટ થઈ. આ વાતની જાણકારી પોલીસને પણ આપવામાં આવી હતી. પોલીસની હાજરીમાં વૃદ્ધાના અંતિમ સંસ્‍કાર કરવામાં આવ્‍યા. ઉલ્લેખનીય છે કે અત્‍યાર સુધી કોઈ પણ પક્ષ તરફથી પોલીસ ફરિયાદ દાખલ કરવામાં નથી આવી. મારપીટમાં ઈજાગ્રસ્‍ત થયેલા ત્રણ લોકોને હોસ્‍પિટલમાં દાખલ કરવામાં આવ્‍યા છે.

પોલીસના જણાવ્‍યા અનુસાર, નરિયાલા ગામના એક વ્‍યક્‍તિનું બુધવારે સવારના રોજ નિધન થઈ ગયુ. મૃતક વ્‍યક્‍તિના સાત દીકરા છે, જે અલગ અલગ રહે છે. પિતાના મૃત્‍યુ પછી એક દીકરાએ મોટા મૃત્‍યુભોજનું આયોજન કરવાનો વિચાર વ્‍યક્‍ત કર્યો હતો, બાકીના છ દીકરાઓએ તેનો વિરોધ કર્યો. આ દરમિયાન ભાઈઓ વચ્‍ચે બોલાચાલી થઈ ગઈ. ગામના લોકો અને સગા-સંબંધીઓએ મળીને જેમ તેમ કરીને તેમને શાંત કર્યા અને મૃતદેહને સ્‍મશાન ઘાટ લઈ જવા માટે નીકળ્‍યા.

સ્‍મશાન ઘાટ જતી વખતે ફરીથી દીકરાઓ લડી પડ્‍યા અને વાત મારપીટ સુધી પહોંચી ગઈ. સ્‍મશાન યાત્રામાં ચાલી રહેલા લોકોએ મૃતદેહને રસ્‍તા પર મૂકીને વાત થાળે પાડી અને ફરી સ્‍મશાન ઘાટ પહોંચ્‍યા. પ્રાપ્ત જાણકારી અનુસાર સ્‍મશાન ઘાટ પહોંચીને પણ તેઓ ફરીથી લડ્‍યા હતા અને મારપીટ શરુ થઈ ગઈ હતી. તે સમયે કોઈએ પોલીસને જાણ કરી. સૂચના મેળવીને પોલીસ સ્‍મશાન ઘાટ પહોંચી હતી. પોલીસની ગેરહાજરીમાં આખરે અંતિમ સંસ્‍કાર કરવામાં આવ્‍યા. આ વિવાદમાં વૃદ્ધના એક દીકરા અને બે પૌત્રને ઈજા થઈ હતી. ત્રણ લોકોને સિવિલ હોસ્‍પિટલમાં દાખલ કરવામાં આવ્‍યા હતા.

આ બાબતે SHO છાયંસા કુલદીપ સિંહે જણાવ્‍યું કે આ બાબતે હજી સુધી કોઈ ફરિયાદ કરવામાં નથી આવી. માટે જો ફરિયાદ આવશે તો કાર્યવાહી કરવામાં આવશે. સૂચના મળ્‍યા પછી પોલીસ મોકલવામાં આવી હતી. બન્ને પક્ષોને પોલીસ સ્‍ટેશન પણ લાવવામાં આવ્‍યા હતા.