News of Tuesday, 25th February 2020
નવી દિલ્હી, તા. ૨૫ :. ભારતની બે દિવસની મુલાકાતે આવેલા અમેરિકાના રાષ્ટ્રપતિ ડોનાલ્ડ ટ્રમ્પ અને તેમના પરિવારનું ગઈકાલે અમદાવાદ અને આગ્રામાં ભવ્ય સ્વાગત કરાયા બાદ આજે તેમના પ્રવાસનો બીજો અને અંતિમ દિવસ છે. આજે ભારત અને અમેરિકા વચ્ચે ત્રણ બીલીયન ડોલરના ડીફેન્સ સહિતના કરારો કરવામાં આવ્યા હતા. બન્ને દેશ ટ્રેડ ડીલ અંગે વાતચીત કરવા સંમત થયા હતા. વડાપ્રધાન મોદી સાથે ટ્રમ્પની વન ટુ વન મીટીંગ યોજાય હતી. એટલુ જ નહિ પ્રતિનિધિ કક્ષાની બેઠક પણ યોજવામાં આવી હતી. આજે બપોરે વડાપ્રધાન મોદીએ ટ્રમ્પના માનમાં બપોરનું ભોજન યોજ્યુ હતું. સાંજે રાષ્ટ્રપતિ ભવનમાં રાષ્ટ્રપતિએ ભવ્ય ડીનર પાર્ટીનું આયોજન કર્યુ છે. ટ્રમ્પની આજે ઉદ્યોગ જગત સાથે મુલાકાત પણ યોજાઈ રહી છે.
ગઈકાલના અતિવ્યસ્ત કાર્યક્રમ બાદ આજે સવારે રાષ્ટ્રપતિ ભવન ખાતે રાષ્ટ્રપતિ ટ્રમ્પનું ઔપચારિક સ્વાગત કરવામાં આવ્યુ હતું. તેમને ગાર્ડ ઓફ ઓનર આપવામાં આવ્યુ હતું. ઉપરાંત ૨૧ તોપોની સલામી આપવામાં આવી હતી. રાષ્ટ્રપતિ કોવિંદ અને પીએમ મોદીએ તેમનુ સ્વાગત કર્યુ હતું. આ ભવ્ય સમારોહ એક યાદગાર સમારોહ બની રહ્યો હતો. સ્વાગત સમારોહ બાદ ટ્રમ્પ અને તેમના પત્નિ રાજઘાટ ગયા હતા અને જ્યાં તેમણે રાષ્ટ્રપિતાની સમાધી પર ફુલો અર્પણ કરી નમન કર્યુ હતું. ઉપરાંત ત્યાં ટ્રમ્પ દંપતિએ વૃક્ષારોપણ પણ કર્યુ હતું.
હૈદરાબાદ હાઉસ ખાતે વડાપ્રધાન મોદી અને ટ્રમ્પ વચ્ચે વન ટુ વન અને પ્રતિનિધિ સ્તરની બેઠક યોજવામાં આવી હતી. જ્યાં બન્ને દેશો વચ્ચે સંરક્ષણ સહિત કરારો કરવામાં આવ્યા હતા. ભારત અને અમેરિકાએ આજે ૩ અબજ ડોલરના સંરક્ષણ સોદા ઉપર સહી-સિક્કા કર્યા હતા. આ સિવાય રાષ્ટ્રપતિ ટ્રમ્પે આતંકવાદના મુદ્દે પાકિસ્તાનનો ઉધડો લીધો હતો. તેમને આજે પણ પાકિસ્તાનની ધરતી ઉપરથી ચાલતા ત્રાસવાદ ઉપર લગામની જરૂર છે તેવુ જણાવ્યુ હતું. રાષ્ટ્રપતિ ટ્રમ્પ અને પીએમ મોદીએ બન્ને દેશો વચ્ચેના મજબૂત સંબંધોનો ઉલ્લેખ કર્યો હતો. ટ્રમ્પે કહ્યુ હતુ કે હું કદી મહેમાનગતિ ભૂલીશ નહિં.
૩ અબજ ડોલરના સંરક્ષણ સોદા અંગે જણાવાયુ હતુ કે અમેરિકાથી ૨૪ એમએચ-૬૦ રોમીયો હેલીકોપ્ટર ખરીદવામાં આવશે. જેની કિંમત ૨.૬ અબજ ડોલર છે. આ ઉપરાંત ૮૦ કરોડ ડોલરના અપાચે હેલીકોપ્ટર ખરીદાશે. પીએમ મોદીએ જોઈન્ટ પ્રેસ કોન્ફરન્સમાં કહ્યુ હતુ કે અમે ભારત અમેરિકા ભાગીદારીની મહત્વની બાબતો પર ચર્ચા કરી હતી. અમે ઉર્જા, ટ્રેડ, પીપલ ટુ પીપલ વાતચીત પર ચર્ચા કરી હતી. સંરક્ષણ ડીલથી બન્ને દેશના સંબંધો વધુ મજબુત થશે.
વડાપ્રધાન મોદી અને ટ્રમ્પ વચ્ચે વ્યાપાર અને નિવેશ, અફઘાનિસ્તાનમાં તાલીબાન સાથે શાંતિ સમજુતી, પાકિસ્તાન, વિશ્વની અનેક બાબતો પર ચર્ચા કરવામાં આવી હતી. ઉપરાંત ૩ અબજ ડોલરના અતિ આધુનિક સૈન્ય હેલીકોપ્ટર અને અન્ય ઉપકરણો માટેના કરારો થયા હતા. ભારત અને અમેરિકા બન્ને દેશો વચ્ચેના સંબંધો વધુ સુદ્રઢ કરવા સંમત થયા હતા. બન્ને નેતાઓ વચ્ચે સરહદ પારથી આચરાતા ત્રાસવાદ અંગે ચર્ચા કરી હતી. ૫-જી ટેકનોલોજી અંગે પણ ચર્ચા થઈ હતી. અંતરિક્ષમા માનવ મોકલવા માટે પણ અમેરિકા મદદ કરશે. ભારત અને અમેરિકા વચ્ચે દ્વિપક્ષીય વેપાર વધે તે માટે બન્ને દેશોએ ચર્ચા વિચારણા કરી હતી.
બાદમાં વડાપ્રધાન મોદી અને રાષ્ટ્રપતિ ટ્રમ્પે સંયુકત પત્રકાર પરિષદને પણ સંબોધન કર્યુ હતું. અમેરિકન દુતાવાસમા ઉદ્યોગ જગત સાથે બેઠકનું પણ આયોજન થયુ હતું. જેમાં અંબાણી, અદાણી સહિતના દિગ્ગજો હાજર રહ્યા હતા.
આજે સાંજે ૭.૩૦ કલાકે ટ્રમ્પ રાષ્ટ્રપતિ ભવનમાં રાષ્ટ્રપતિ રામનાથ કોવિંદને મળશે અને રાષ્ટ્રપતિએ યોજેલા ડીનરમાં સામેલ થશે. ડીનરમાં ભાગ લીધા બાદ રાત્રે ૧૦ કલાકે ટ્રમ્પ અમેરિકા જવા રવાના થશે.