Gujarati News

કાબુલ,તા.૨૪ : અફઘાનિસ્તાનમાં ૨૦ વર્ષ પછી સત્તા પર આવેલા તાલિબાનોએ ઉત્પાત મચાવવાનુ શરુ કરી દીધુ છે. ૨૦ વર્ષ પહેલા તાલિબાને જે ક્રુરતા આચરી હતી તે જ દ્રશ્યો હવે ફરી જોવા મળી રહ્યા છે.

તાલિબાને ગઝની પ્રાંતનુ પ્રવેશદ્વાર તોડી પાડ્યુ છે. જે આ પ્રાંતની સાંસ્કૃતિક ધરોહર તરીકે જોવામાં આવતુ હતુ. તાલિબાનીઓને આ પ્રવેશ દ્વાર ગમ્યુ નહોતુ અને આથી તેને પાડી નાંખવામાં આવ્યુ છે. ગઝની પ્રાંતના આ ગેટને તોડવામાં આવતો વિડિયો હવે સોશિયલ મીડિયા પર વાયરલ થઈ રહ્યો છે.આ ગેટને અશરફ ગની સરકારે બનાવ્યો હતો.

જોકે તોડફોડની આ પહેલી ઘટના નથી. સત્તા પર આવ્યા બાદ તાલિબાને બામિયાનમાં હજારા નેતા અબ્દુલ અલી મજારીની પ્રતિમા પણ તોડી નાંખી હતી. તાલિબાને ૧૯૯૫માં તેમની હત્યા કરી નાંખી હતી. બામિયાન પ્રાંત એ જ જગ્યાએ છે જ્યાં ભગવાન બુધ્ધની વિરાટકાય મૂર્તિને તાલિબાને ૨૦૦૧માં પોતાના શાસન દરમિયાન વિસ્ફોટકોથી ઉડાવી દીધી હતી.