Gujarati News

નવી દિલ્હી, તા. ૨૪ : પાંચ રાજ્યોમાં ચૂંટણીઓ યોજાવાની છે પરંતુ સૌથી વધુ ચર્ચા પશ્ચિમ બંગાળની ચૂંટણીની છે. મતદાનના પ્રથમ તબક્કા પહેલા એવા સમાચાર આવ્યા છે જેથી ભાજપના નેતાઓની અપેક્ષાઓ નોંધપાત્ર રીતે વધી ગઈ છે. ઓપિનિયન પોલમાં અત્યાર સુધી પછડાતું ભાજપ હવે ટીએમસીની બરાબરી પર પહોંચ્યું છે. એવું ત્યારે જોવા મળી રહ્યું છે જ્યારે પ્રથમ તબક્કાનું મતદાન પણ થયું નથી. જણાવી દઈએ કે, બંગાળમાં આઠ તબક્કામાં ચૂંટણી છે અને ભાજપની બેઠકો ઓપિનિયન પોલમાં વધતી જોવા મળી રહી છે.

મમતા બેનર્જી અને ડાબેરીઓ દ્વારા આઠ તબક્કામાં મતદાન અંગે પહેલાથી જ પ્રશ્નો ઉભા કરવામાં આવ્યા હતા. ચૂંટણી નિષ્ણાતો પણ આ વાત માને છે કે, જ્યારે ચૂંટણીઓ વધુ તબક્કામાં હોય ત્યારે રાજકીય પક્ષોને તે મુજબ તેમની વ્યૂહરચનાની યોજવાની તક મળે છે. આમાં કેટલીકવાર રાજકીય પક્ષો વિવિધ પ્રદેશો અનુસાર વ્યૂહરચના બનાવે છે. અત્યારે ઓપિનિયન પોલ્સના વલણથી ભાજપને ફાયદો થાય તેમ લાગી રહ્યું છે.

પશ્ચિમ બંગાળ વિધાનસભાની ચૂંટણીના પહેલા તબક્કા પહેલા આવેલા એબીપી-સીએનએક્સ ઓપિનિયમ પોલમાં ભાજપ અને ટીએમસી વચ્ચે કાંટાની ટક્કરની આગાહી કરવામાં આવી છે. ઓપિનિયન પોલ્સ અનુસાર મમતા બેનર્જીની આગેવાનીવાળી ટીએમસીને ૧૩૬થી ૧૪૬ બેઠકો મળી શકે છે. જ્યારે ભાજપને ૧૩૦થી ૧૪૦ બેઠકો મળવાનો અંદાજ છે. રાજ્યમાં બહુમતીનો જાદુઈ આંકડો ૧૪૮ છે.

એબીપી ન્યૂઝ અને સીએનએક્સ દ્વારા થોડા દિવસો પહેલા હાથ ધરવામાં આવેલા ઓપિનિયન પોલમાં મમતા બેનર્જીની સરકાર બનતી જોવા મળી રહી છે. સર્વેમાં ટીએમસીને ૧૫૪થી ૧૬૪ બેઠકો પર લીડ મળી રહી છે. જ્યારે ભાજપને ૧૦૨થી ૧૧૨ બેઠકો મળવાની ધારણા હતી. થોડા દિવસો પછી ઓપિનિયન પોલમાં ભાજપ આગળ હોવાનું જોવા મળ્યું છે.

કેટલાક રાજ્યોની ચૂંટણીઓમાં એવું જોવા મળ્યું છે કે પ્રારંભિક તબક્કામાં જે રાજકીય પક્ષો પાછળ પડતા જોવા મળ્યા હતા, તેઓએ પછીના તબક્કામાં વ્યૂહરચના બદલીને વધુ આગળ નીકળી ગયા. ગયા વર્ષે યોજાયેલી બિહારની ચૂંટણીમાં ભાજપ પ્રારંભિક તબક્કામાં પાછળ રહી હોવાનું જોવા મળ્યું હતું. પરંતુ પછીના તબક્કામાં જ્યાં ચૂંટણીઓ યોજવામાં આવી હતી, ત્યાં પાર્ટીએ સારું પ્રદર્શન કર્યું હતું.

ચૂંટણી નિષ્ણાતો પણ આ વાત માને છે કે ચૂંટણીમાં સમયનો ખૂબ મહત્વ હોય છે. આ દરમિયાન રાજકીય પક્ષોને પોતાની વ્યૂહરચના ઘડવાની પૂરતી તક મળે છે. વોટિંગ પેટર્નના આધારે તેઓ આગળનું વિચારે છે, અને આ દરમિયાન એક એવો મુદ્દો હાથ લાગી જાય છે જેનો રાજકીય પક્ષો લાભ ઉઠાવે છે. એકંદરે એવું પણ કહી શકાય કે ડેમેજ કંટ્રોલ માટે પણ સંપૂર્ણ તક હોય છે.

ચૂંટણી પચ દ્વારા જેમ જ બંગાળ વિધાનસભા ચૂંટણી માટે ૮ તબક્કામાં મતદાન અંગે જાહેરાત કરવામાં આવી કે, પશ્ચિમ બંગાળના સીએમ મમતા બેનર્જીએ સવાલો ઉઠાવ્યા. સાથે જ ડાબેરીઓએ પણ આ નિર્ણય પર આંગળીઓ ઉભી કરી. જણાવી દઈએ કે, પશ્ચિમ બંગાળામાં પ્રથમ તબક્કામાં ૩૦ બેઠકો પર ૨૭ માર્ચે મતદાન થવાનું છે. જ્યારે મતગણતરી ૨ મેના રોજ હાથ ધરાશે.

નોંધનીય છે કે, ભાજપે બંગાળમાં ખૂબ જોર લગાવ્યું છે અને તેની કમાન અમિત શાહના હાથમાં છે. પાર્ટી ૨૦૦થી વધુ બેઠકો જીતવાનો દાવો કરી રહી છે. ટીએમસી અને ભાજપ વચ્ચે જોરદાર હરીફાઈ ચાલી રહી છે અને બંને પક્ષો પાસે સમય પણ છે. આ સમયનો લાભ કોણે ઉઠાવ્યો તે ૨ મેના રોજ જ ખબર પડશે.