Gujarati News

અલવર, તા. ૨૪ : એક તો વર્દીનો પાવર, અને ક્યારેક તેમાં ભળતો દારુનો નશો ક્યારેક પોલીસકર્મીઓને છાટકા બનાવી દે છે. જોકે, કાયદો સર્વોપરી છે, અને આવા પોલીસકર્મીઓને પણ બહુ જલ્દી તેનું ભાન કરાવાતું હોય છે. આવી જ એક ઘટનામાં દારુ પીને એક મહિલાના ઘરમાં ઘૂસી જઈને તેની સાથે ગેરવર્તન કરનારા પોલીસ કોન્સ્ટેબલને માત્ર ૧૩ જ કલાકમાં ચાર્જશીટ દાખલ કરીને ડિસમિસ કરી દેવાયો છે.

ગેરવર્તન કરનારા કોઈ પોલીસકર્મી સામે આટલી ઝડપથી કાર્યવાહી કરવામાં આવી હોય તેવો દેશનો આ પહેલો કિસ્સો રાજસ્થાનના અલવર જિલ્લામાં બન્યો છે. જિલ્લાના ભિવાડીમાં કોન્સ્ટેબલ તરીકે ફરજ બજાવતો ૩૨ વર્ષીય નરેશ કુમારે મંગળવારે વહેલી સવારે એક મહિલાના ઘરમાં ઘૂસી જઈને તેની સાથે ગેરવર્તન કર્યું હતું.

પોલીસ સૂત્રોના જણાવ્યા અનુસાર, આરોપી કોન્સ્ટેબલ ભીવાડી પોલીસ લાઈન્સમાં ફરજ બજાવતો હતો. નોકરી સાથે તે એક મહિલા સાથે ભાગીદારીમાં ન્યૂરો સેન્ટર ચલાવતો હતો. સોમવારે સવારે નરેશ કુમાર નશાની હાલતમાં થેરપી સેન્ટરમાં ગયો હતો. તેણે ત્યાં જઈને કોઈ યુવતી તેની મસાજ કરી આપે તેવી ડિમાન્ડ કરી હતી. જોકે, પોતાની વિધવા બહેન સાથે સેન્ટર ચલાવતી મહિલાએ તેની સામે વાંધો લીધો હતો અને તેને ત્યાંથી નીકળી જવા માટે કહ્યું હતું. તે વખતે બબાલ થતાં નરેશ ત્યાંથી નીકળી ગયો હતો.

જોકે, મંગળવારે રાત્રે સવા બાર વાગ્યે નરેશ આ મહિલાના ઘરે દારુના નશામાં ધૂત થઈને પહોંચ્યો હતો અને ત્યાં તેની સાથે બબાલ કરી હતી. નરેશે પોતે ધંધામાં જેટલા રુપિયા રોક્યા છે તે પાછા આપી દેવાની ડિમાન્ડ સાથે મહિલા સાથે અણછાજતું વર્તન કર્યું હતું. નરેશે અડધી રાત્રે તમાશો કરતાં મહિલાએ પોલીસને બોલાવી હતી. નશાની હાલતમાં રહેલા નરેશની ઘટના સ્થળે જ ધરપકડ કરવામાં આવી હતી, અને મહિલાની ફરિયાદના આધારે માત્ર ૧૩ કલાકમાં જ કોન્સ્ટેબલ સામે ચાર્જશીટ દાખલ કરીને તેને નોકરીમાંથી જ ડિસમિસ કરી દેવામાં આવ્યો હતો. સામાન્ય રીતે પોલીસકર્મી પર કોઈ આરોપ લાગે ત્યારે તેની બદલી કરવામાં આવતી હોય છે, અને જો આરોપ ગંભીર હોય તો તેને સસ્પેન્ડ કરવામાં આવતો હોય છે. જોકે, આ ઘટનાની ગંભીરતા જોતાં કોન્સ્ટેબલને કલાકોમાં જ ડિસમિસ કરી દેવામાં આવ્યો હતો. રાજસ્થાનની પોલીસ છેલ્લા કેટલાક દિવસોથી વિવાદમાં રહી છે. થોડા દિવસ પહેલા એસીપી કક્ષાના એક પોલીસ અધિકારીએ એક મહિલા પોલીસકર્મી સાથે ગેરવર્તન કરી તેની પાસેથી અણછાજતી માગણી કરી હતી. આ વિવાદ હજુ શમ્યો નહોતો તે પહેલા જ બે દિવસ અગાઉ ચિત્તોડગઢ જિલ્લામાં છજીૈં કક્ષાના એક પોલીસકર્મી પર ચોરીના કેસના આરોપીના ઘરમાં તેની પત્નીની છેડતી કરવાનો આરોપ લાગતા તેની ટ્રાન્સફર કરવામાં આવી હતી.