Gujarati News

કરીમનગર તા. ૨૩ : તેલંગણા રાજ્યના કરીમનગર શહેરની નગર પાલિકા દ્વારા એક અનોખી યોજના બનાવવામાં આવી છે. જે મુજબ આવતા મહિનાથી કરીમનગર શહેરમાં માત્ર એક રૂપિયામાં અંતિમ સંસ્કાર કરવામાં આવશે. શહેરના સામાન્ય અને ગરીબ લોકોના અંતિમ સંસ્કાર સન્માન સાથે અને વ્યવસ્થિત રીતે થઇ શકે તેવા હેતુ સાથે આ યોજના રજુ કરવામાં આવી છે.

કરીમનગરના મેયર એસ. રવિન્દર સિંહના જણાવ્યા અનુસાર 'અંતિમયાત્રા આખરી સફર' નામની આ યોજના આગામી ૧૫મી જૂનથી શરૂ થનાર છે. આ યોજના માટે ૧.૧૦ કરોડ રૂપિયાની ફાળવણી કરવામાં આવી છે. જેના વડે મૃતકના જે તે ધર્મના રીત રીવાજ મુજબ અંતિમ સંસ્કાર કરવામાં આવશે.

આ યોજના અનુસાર કરીમનગર નગરપાલિકા દ્વારા અંતિમ સંસ્કાર માટે મૃતકના પરિવારને લાકડા, ચંદન અને કેરોસીન પુરૃં પાડવામાં આવશે. લાકડા ખરીદવા માટે ૫૦ લાખની રકમ અનામત રાખવામાં આવશે. આ સિવાય આ યોજના અંતર્ગત અંતિમયાત્રાના દિવસે મૃતકના પરિવારના ૫૦ લોકોને ૫ રૂપિયા પ્રતિ વ્યકિતના દરે ભોજન પણ આપવામાં આવશે. ઉપરાંત સ્થળ પર જ મૃતકનું ડેથ સર્ટીફીકેટ મળે તેવી વ્યવસ્થા પણ કરવામાં આવશે.

મેયરના જણાવ્યા અનુસાર કરીમનગર શહેરમાં દરરોજ એવરેજ ચારથી પાંચ વ્યકિત મૃત્યુ પામે છે. તેમણે દાતાઓને આ યોજનામાં યોગદાન આપવા માટેની અપીલ પણ કરી છે.