Gujarati News

મુંબઈ, તા.૨૨: મહારાષ્‍ટ્રમાં ૨૦૧૯માં સરકાર રચવાના નિષ્‍ફળ પ્રયત્‍નો બાદ ભાજપ ફુંકી ફુંકીને આગળ વધવા માંગે છે. ભાજપ કોઇ ભુલ કે કચાશ નથી ઇચ્‍છતું કે ૨૦૧૯નું પુનરાવર્તન થાય.

ભાજપના એક નેતાએ કહ્યું, ‘અમારી પાસે પ્‍લાન A અને પ્‍લાન B છે. અમારી પ્રથમ યોજના મુજબ, જો શિવસેના તરત જ વિભાજિત થાય છે, તો ભાજપ પાસે બળવાખોર જૂથ સાથે ગઠબંધન કરીને સરકાર બનાવવાની સારી તક હશે. અહીં કેચ એ છે કે બળવાખોર શિવસેના નેતા એકનાથ શિંદેને તેમની તરફેણમાં બે તળતીયાંશ બહુમતી જાળવી રાખવી પડશે. વૈકલ્‍પિક રીતે, અમે વિધાનસભા અને લોકસભા ચૂંટણીમાં ફાયદો મેળવવા માટે શિવસેનામાં વિભાજનનો ઉપયોગ કરવાની યોજના બનાવી રહ્યા છીએ.'

પક્ષના નેતાઓએ એમ પણ કહ્યું હતું કે રાજ્‍ય વિધાનસભાનું ચોમાસુ સત્ર ૧૮ જુલાઈથી શરૂ થશે, તેથી ભાજપ મહા વિકાસ અઘાડી (MVA) સરકાર સામે અવિશ્વાસ પ્રસ્‍તાવ લાવશે. ફ્‌લોર ટેસ્‍ટ શાસક MVA દ્વારા પ્રાપ્ત નંબરો જાહેર કરશે, એક નેતાએ જણાવ્‍યું હતું.

સૂત્રોએ જણાવ્‍યું કે શિંદે શિવસેનાના ૫૫માંથી ઓછામાં ઓછા ૩૭ ધારાસભ્‍યોને જાળવી રાખે તેવી શકયતા છે. ‘જો શિંદે સફળ થશે, તો તે બીજેપી સાથે વિલીનીકરણ માટેના દરવાજા ખોલશે, જો કે તે તેમના નિર્ણયને આધીન રહેશે,' સૂત્રએ જણાવ્‍યું હતું.

ભાજપ ૧૦૬ ધારાસભ્‍યો સાથે એકમાત્ર સૌથી મોટી પાર્ટી છે અને તેને નાના પક્ષો અને અપક્ષો સહિત ૨૭ વધારાના ધારાસભ્‍યોનું સમર્થન છે. આમ, ૧૩૩ મતો અને ૩૭ બળવાખોર શિવસેના ધારાસભ્‍યો સાથે ભાજપની સંખ્‍યા વધીને ૧૭૦ થશે, એમ સૂત્રોએ જણાવ્‍યું હતું. જ્‍યારે બહુમત માટે ૧૪૫ ધારાસભ્‍યોની જરૂરિયાત છે.

તાજેતરની રાજ્‍યસભા અને વિધાન પરિષદની ચૂંટણીઓ દરમિયાન, વિધાનસભામાં વિપક્ષના નેતા દેવેન્‍દ્ર ફડણવીસે કહ્યું હતું કે, અમારી વ્‍યૂહરચના MVAની અંદરની અશાંતિનો લાભ લેવાની છે. કોંગ્રેસ, એનસીપી, શિવસેના અને અપક્ષ ઉમેદવારો જેવા નાના પક્ષોના નારાજ ધારાસભ્‍યોને ભાજપ એક વિશ્વસનીય વિકલ્‍પ પ્રદાન કરવા જઈ રહી છે.

બીજેપીના એક ધારાસભ્‍યએ કહ્યું, શિવસેનામાં બળવાને કારણે બે સંગઠનો અમારી સામે આવ્‍યા છે- ઉદ્ધવ ઠાકરેની સેના વિ એકનાથ શિંદેની સેના... હવે, ૨૦૧૯ની વિધાનસભા ચૂંટણી પછી ઉદ્ધવ ઠાકરેએ પહેલેથી જ ભાજપ સાથે દગો કર્યો હોવાથી, અમારી પાસે શિંદેની સેનામાં વધુ વિકલ્‍પો છે.

૨૩ નવેમ્‍બર, ૨૦૧૯ ના રોજ, રાજ્‍યપાલ ભગત સિંહ કોશ્‍યારીએ ફડણવીસને મુખ્‍ય પ્રધાન તરીકે અને NCPના અજિત પવારને મહારાષ્‍ટ્રના નાયબ મુખ્‍ય પ્રધાન તરીકે શપથ લેવડાવ્‍યા હતા. જોકે, સરકાર માત્ર ૮૦ કલાક જ ચાલી શકી હતી. ૨૮ નવેમ્‍બર, ૨૦૧૯ ના રોજ, શિવસેના પ્રમુખ ઉદ્ધવ ઠાકરેએ મુખ્‍ય પ્રધાન તરીકે શપથ લીધા.

પ્રદેશ ભાજપ અધ્‍યક્ષ ચંદ્રકાંત પાટીલે કહ્યું, ‘૨૦૧૯માં શિવસેના અને ભાજપે સહયોગી તરીકે ચૂંટણી લડી હતી, પરંતુ ઉદ્ધવ ઠાકરેએ કોંગ્રેસ અને એનસીપી સાથે હાથ મિલાવીને તેમની સાથે દગો કર્યો હતો. આ નિર્ણય તેના મોટાભાગના સભ્‍યોને સ્‍વીકાર્ય ન હતો, પરંતુ ઠાકરેએ તેમને ખાતરી આપવાનું ચાલુ રાખ્‍યું કે ત્રણ-પક્ષીય જોડાણ કામચલાઉ હતું, જેનો હેતુ ભાજપને પાઠ ભણાવવાનો હતો. બાદમાં તેઓ ભાજપ સાથે હાથ મિલાવશે.

‘હવે, મોટાભાગના શિવસેના સભ્‍યો માને છે કે તેમને તેમના મતવિસ્‍તારો જાળવી રાખવા માટે ભાજપના સમર્થનની જરૂર છે. તેઓ આગામી ચૂંટણીમાં કોંગ્રેસ અને એનસીપી સાથે ગઠબંધન કરી શકે નહીં. ભાજપના એક નેતાએ કહ્યું, ‘ભાજપ અને શિવસેના કુદરતી સાથી હતા. શિવસેનાના સભ્‍યો માત્ર મુખ્‍યમંત્રી પદ માટે કોંગ્રેસ અને એનસીપી જેવા વિરોધીઓ સાથે ગઠબંધન કેવી રીતે સ્‍વીકારી શકે.