Gujarati News

સમાન્ય રીતે શહેરોમાં લગ્ન કરીએ તો 3-4 લાખ ખર્ચ તો આવે જ છે પણ તેમાં બહુ બહુ તો કોઈ સારા પાર્ટી પ્લોટમાં લગ્ન કરી શકો છો અને પાછળ કોઈ ખોટા મહેલ જોવી થીમ ઉભી કરી શકો છો. પરંતુ જો તમને એમ ખબર પડે કે આટલા જ રુપિયામાં તમે ખરેખર કોઈ શાનદાર મહેલમાં રૉયલ્સની જેમ મેરેજ ફંક્શન કરી શકો છો તો? તમે કહેશો એવું થોડું હોય આવી જગ્યાએ તો માલેતુજારો અને સેલિબ્રિટિઝ જ મેરેજ કરી શકે કેમ કે તે ખૂબ મોંઘી હોય છે. આટલા સસ્તામાં મહેલમાં લગ્ન શક્ય જ નથી. પણ જરા થોભો ઉતાવળે પોતાની જાતે વિચારી લેવા કરતા અહીં કેટલાક મહેલના નામ અને તેના પ્રાઇઝ કાર્ડ પર નજર ફેરવી લો તમારો વિચાર તરત બદલાઈ જશે.

દિલ્હી-NCRની સૌથી નજીક નીમરાના ફોર્ટ છે. નીમરાના ફોર્ટ પેલેસ 1464માં બન્યો હતો જે પૃથ્વીરાજ ચૌહાણ ત્રીજાના વંશજોની રાજધાની પણ હતી. પૃથ્વીરાજે 1192માં મોહમ્મદ ગૌરીને હરાવી અહીં જ આવ્યા હતા. આ મહેલમાં 72થી વધુ રુમ છે. દરેક રુમના અલગ અલગ નામ છે. વેડિંગ પ્લાનિંગ કંપનીઓની વેબાસાઇટ મુજબ 1 લાખ રુપિયામાં 50 ગેસ્ટ સાથે એક રાતના ફંક્શન માટે તમે અહીં બુક કરી શકો છો. જેમાં હોટેલ, ડેકોરેશન, ખાણીપીણીનો તમામ ખર્ચ પણ સામેલ કરશો તો બજેટ 5 લાખ પહોંચી જશે. આ પેલેસ દિલ્હી આંતરરાષ્ટ્રીય એરપોર્ટથી 108 કિમી દૂર છે.

હેરિટેજ પેલેસ હોટલ્સમાં વેડિંગ પ્લાનર દ્વારા જો જશો તો તમને વધઉ સારી ડીલ મળી શકે છે. કેમ કે આ પ્લાનર્સની કંપનીઓ સાથે હોટલ્સના પહેલાથી કરાર થયા હોય છે જેથી તેમને ડિસ્કાઉન્ટ રેટ મળે છે. જ્યારે ડાયરેક્ટ ડીલ થોડી મોંઘી પડી શકે છે. તેમજ આ માટે બુકિંગ પણ ખૂબ વહેલું કરાવી લેવું પડે છે.

ચોમૂ પેલેસમાં મુગલ સમયની છાપ જોવા મળે છે. અહીં જનાના ખાસ, દિવાન-એ-આમ, દિવાન-એ-ખાસ, મંદિર ગેલેરી, બગીચા છે. અહીં બોલ બચ્ચન અને ભૂલભૂલૈયા જેવી ફિલ્મોના શૂટિંગ પણ થયા છે. ચોમૂગઢ પેલેસ ઠાકુર નાથના પૌત્ર ઠાકુર કરણસિંહે બંધાવ્યો હતો. આ ગઢ 1714માં બન્યો હતો અને વર્ષ 1863થી 1901 દરમિયાન તેને મહેલમાં ફેરવી નાખવામાં આવ્યો. હવે આ એક હેરિટેજ હોટેલ છે. ઠાકુર કરણસિંહના પૂર્વજો પૃથ્વીરાજ ચૌહાણ સાથે સંબંધ ધરાવે છે. આ મહેલ 300 વર્ષ જૂનો છે. આ ત્રણ માળના મહેલમાં તમને અનેક રાજસ્થાની આર્ટ જોવા મળશે. ચોમૂ મહેલ રાજસ્થાનની રાજધાની જયપુરથી માત્ર 30 કિમી દૂર છે. વેડિંગ પ્લાનન વેબસાઇટ મુજબ અહીં રુમ રેન્ટ 6000 રુપિયાથી શરુ થાય છે. અહીં 58 જેટલા ડિલક્સ રુમ છે. અહીં 50 મહેમાનો સાથે એક રાત માટે લગ્નનું બુકિંગ 1 લાખમાં થાય છે. જોકે ખાણીપીણી અને ડેકોરેશનનો ખર્ચ એડ કરો તો કુલ બજેટ 3-5 લાખ પહોંચી જાય છે.

સરિસ્કા પેલેસ મહેલ 1892માં મહારાજા જયસિંહે બનાવ્યો હતો. તેને ફ્રેંચ આર્કિટેક્ટે ડિઝાઇન કર્યો હતો. પેલેસ સ્ટ્રક્ચરને ક્વીન વિક્ટોરિયાના પુત્ર ડ્યુક ઓફ કનોટ માટે વધારવામાં આવ્યું અને પછી તેને રૉયલ હંટિંગ લોજ તરીકે પ્રયોગ કરવામાં આવતો હતો. અહીં બેંક્વેટ, પાર્ટી અને લગ્ન માટે ખૂબ મોટી જગ્યા છે. અહીં એક જ સાથે 1000 મહેમાનોનું ફંક્શન કરી શકાય છે. સરિસ્કા પેલેસ મહેલમાં 101 રુમ છે. અહીં પણ તમે રુ. 1 લાખમાં એક રાત માટે 50 લોકોના ફંક્શનનું બુકિંગ કરી શકો છો. જ્યારે સંપૂર્ણ લગ્ન ખર્ચ પેટે રુ. 2-5 લાખ જેટલો ખર્ચો થઈ શકે છે.

ઉદયપુરનો ચૂંડા પેલેસ મેવાડ સામ્રાજ્યનો ભાગ હતો. રાજસ્થાની સંસ્કૃતિની તમામ ઝલક આ હોટેલમાં નજર આવશે. આ પેલેસ બનાવવામાં 16 વર્ષનો સમયગાળો લાગ્યો હતો. અહીં કુલ 46 રુમ છે. અહીંથી તમે લેક સિટી અને મિની વેનિસ કહેવાતા ઉદયપુરના દ્રશ્યોને રુમથી જોઈ શકાય છે. અહીં લગ્નની એક રાતનું ફંક્શન 50 મહેમાનો સાથે ખૂબ ઓછા ખર્ચમાં કરી શકો છો. લગ્ન અહીં કુલ ખર્ચ 3-5 લાખ વચ્ચે આવે છે.