Gujarati News

બેંગ્લોર તા.૨૦: કર્ણાટકના હાસન શહેરમાં લગ્નની વિધિ પતાવીને તરત જ નવવધૂ સાસરે જવાને બદલે સીધી સ્કૂલમાં ગઇ. ગવર્નમેન્ટ ફર્સ્ટ ગ્રેડની પરીક્ષાની તૈયારી કરી રહેલી શ્વેતા નામની કન્યાનાં લગ્ન ૧૮ નવેમ્બરે હતાં. તેની પરીક્ષા ઓરિજિનલી ૩ નવેમ્બરે હતી, પણ લોકસભાની પેટાચૂંટણીઓ જાહેર થતાં પરીક્ષા પાછી ઠેલાઇ અને ૧૮ નવેમ્બરે જ એની તારીખ આવી. શ્વેતાએ પરીક્ષાની ખૂબ તૈયારી કરી હતી એટલે તે લગ્ન માટે થઇને છ મહિના બગાડવા નહોતી માંગતી. તેનો પતિ અને સાસરિયાં પણ તે પરીક્ષા પૂરી કરી દે એ વાત સાથે સહમત હતાં એટલે રવિવારે સવારે પોણાઆઠથી પોણાનવ વચ્ચે લગ્નની વિધિ પૂરી કરીને તે સીધી એકઝામના હોલ પર પહોંચી ગઇ હતી. તેનો પતિ હોલની બહાર બેઠો તેની રાહ જોતો રહયો. પેપર લખીને બહાર આવી એ પછી લગ્ન બાદની બાકીની વિધિઓ પુરી કરવામાં આવી.