Gujarati News

મુંબઇઃ નાદારી નોંધાવનારી ભૂષણ પાવર એન્ડ સ્ટીલ લિમિટેડને ખરીદવા માટે ચાલી રહેલી બિડિંગ પ્રક્રિયામાં JSW સ્ટીલે રૂૂ.19,500 કરોડની સુધારેલી ઓફર જમા કરાવી છે જ્યારે ટાટા સ્ટીલ અને લિબર્ટી હાઉસે તેમની બીજી વખતની ઓફરમાં કોઈ વધારો કર્યો નથી એમ બે સિનિયર અધિકારીએ જણાવ્યું હતું. JSW સ્ટીલે છ મહિનામાં આ ત્રીજી ઓફર કરી છે. પહેલા રાઉન્ડમાં કંપનીએ રૂૂ.11,000 કરોડ અને બાદમાં જુલાઈમાં રૂૂ.18,000 કરોડની ઓફર જમા કરાવી હતી.

ઓફરમાં સુધારો કરવાની JSW સ્ટીલની હિલચાલનો વિરોધ કરનારી ટાટા સ્ટીલે તેની રૂૂ.17,000 કરોડની ઓફરમાં વધારો કરવાની ના પાડી હતી જ્યારે લિબર્ટી હાઉસે પણ તેની રૂૂ.18,000 કરોડની ઓફરમાં કોઈ ફેરફાર કર્યો નથી એમ અધિકારીઓએ જણાવ્યું હતું.

ત્રણેય કંપનીએ ગઈકાલે રાત્રે કમિટી ઓફ ક્રેડિટર્સ (CoC) સમક્ષ આ બિડ જમા કરાવી હતી. ભૂષણ પાવરના રિઝોલ્યુશન માટે ટાટા સ્ટીલે કરેલી અરજીના પગલે નેશનલ કંપની લો એપેલટ ટ્રિબ્યુનલ (NCLAT)એ છઠ્ઠી ઓગસ્ટે ભૂષણ પાવર માટે સુધારેલી બિડ જમા કરાવવાની છેલ્લી તારીખ એક સપ્તાહ લંબાવી હતી.

ભૂષણ પાવર એન્ડ સ્ટીલે વિવિધ ધિરાણકારોને રૂૂ.49,264 કરોડ ચૂકવવાના બાકી છે અને તેની સ્ટીલ ઉત્પાદન કરવાની વાર્ષિક ક્ષમતા 35 લાખ ટનની છે. JSW સ્ટીલની આ ત્રીજી ઓફર તેની પ્રથમ ઓફર કરતાં 77 ટકા વધારે છે અને જો તેને સ્વીકારવામાં આવશે તો ધિરાણકારોની ખોટમાં ઘટાડો થશે. બિડિંગ માટે મળેલી બેઠકમાં હાજર રહેલા એક બેન્ક અધિકારીએ જણાવ્યું હતું કે, “મંગળવારે મોડી સાંજે મળેલી મેરેથોન બેઠકમાં ધિરાણકારોએ તમામ ત્રણ બિડર્સની ઓફર્સની સમીક્ષા કરી હતી.

કમિટી ઓફ ક્રેડિટર્સ (CoC) ત્રણેય બિડ્સનું મૂલ્યાંકન કરી રહી છે અને 17મી ઓગસ્ટે NCLAT સમક્ષ તેનો નિર્ણય જાહેર કરશે.” જો કોર્ટ સુધારેલી ઓફર્સ સ્વીકારવાની મંજૂરી આપશે તો સૌથી ઊંચી બિડ કરનારી JSW સ્ટીલ મેદાન મારી જશે તેવું લાગે છે એમ અધિકારીએ ઉમેર્યું હતું.