Gujarati News

રાજકોટ, તા. ૧૬ :. એક તરફ દેશમાં કોરોના બિહામણી રીતે ધૂણી રહ્યો છે અને પ્રજા હેરાનપરેશાન છે ત્યારે સરકાર પેટ્રોલ અને ડીઝલના ભાવમાં વધારો ઝીંકી આમઆદમીની પરેશાનીમાં વધારો કરી રહી છે. છેલ્લા ૧૦ દિવસથી પેટ્રોલ અને ડીઝલના ભાવ વધતા પ્રજામાં ભયંકર રોષ ફાટી નીકળ્યો છે અને લોકો સવાલ પૂછવા લાગ્યા છે કે કપરા સમયમાં અમારો વાંક શું ? અમારો ગુન્હો શું ? સરકાર એક તરફ રાહત પેકેજનો મલમ લગાડી રહી છે તો બીજી તરફ ભાવ વધારાનો ધગધગતો ડામ આપતા પ્રજામાં રાડ બોલી ગઈ છે. ડીઝલ અને પેટ્રોલના ભાવમાં વધારો થતા તમામ ચીજવસ્તુઓના ભાવો ભડકે બળે તેવી શકયતા છે અને પ્રજાનું માસિક બજેટ અસ્તવ્યસ્ત થઈ જવા પામ્યું છે. ક્રૂડના ભાવ ઘટી રહ્યા છે ત્યારે પેટ્રોલ-ડીઝલના ભાવ વધારવા કેટલા અંશે વ્યાજબી છે ? તેવો સવાલ પણ પ્રજા પૂછી રહી છે.

છેલ્લા ૧૦ દિવસથી પેટ્રોલ અને ડીઝલ ભાવ એકધારા વધી રહ્યા છે. ગઈકાલે ગુજરાત સરકારે પેટ્રોલ અને ડીઝલમાં બે - બે રૂપિયાનો વધારો જાહેર કર્યો છે જે આજથી અમલમાં આવી ગયો છે. જે પછી પેટ્રોલનો ભાવ ૭૪.૩૩ અને ડીઝલનો ભાવ ૭૨.૬૭ થઈ ગયો છે. દરમિયાન આજે પણ ઓઈલ કંપનીઓએ પેટ્રોલ અને ડીઝલ ભાવ વધાર્યા છે. આજે પેટ્રોલમાં ૪૭ પૈસા અને ડીઝલમાં ૫૭ પૈસાનો વધારો થયો છે. એ સાથે દિલ્હીમાં પેટ્રોલનો ભાવ હવે ૭૬.૭૩ રૂ. થયો છે તો ડીઝલનો ભાવમાં ૭૫.૧૯ રૂ. થયો છે. હજુ પેટ્રોલ-ડીઝલના ભાવમાં રાહત મળે તેવી સંભાવના નથી. આ મહિનાના અંત સુધીમાં પેટ્રોલનો ભાવ ૮૦ રૂ. પ્રતિ લીટર થઈ જાય તેવી શકયતા છે. હજુ પેટ્રોલ અને ડીઝલમાં ૪ થી ૫ રૂ.નો વધારો થઈ શકે છે. અત્યારે રોજ ૫૦ થી ૬૦ પૈસા વધે છે જે ઘટીને ૩૦ થી ૪૦ પૈસા થઈ જશે. ૮૩ દિવસ કોઈ ભાવ વધારો ન કર્યા બાદ ૧૦ દિવસથી કંપનીઓ સતત ભાવ વધારી રહી છે. એવામા ગુજરાત સરકારે પોતાની તિજોરી ભરવા બે - બે રૂ.નો ભાવ વધારો ઝીંકી દીધો છે અને પ્રજાને પડયા પર પાટુ માર્યુ છે.  છેલ્લા ૧૦ દિવસમાં ડીઝલમાં રૂ. ૫.૮૦ તો પેટ્રોલમાં રૂ. ૫.૪૫ પ્રતિ લીટર વધ્યા છે અને એ પણ ક્રૂડના ભાવ ઘટાડો થઈ રહ્યો છે ત્યારે. પેટ્રોલ અને ડીઝલના ભાવ વધારાને કારણે ટ્રાન્સપોર્ટેશન મોંઘુ થશે અને તેના કારણે આવશ્યક ચીજવસ્તુઓના ભાવો ભડકે બળશે. શાકભાજીથી માંડી અનાજના ભાવોમાં વધારો થઈ જશે. બસ ભાડા, ટેકસી ભાડા, ટ્રક ભાડા વગેરેમાં આગામી દિવસોમાં વધારો થવાને કારણે ચીજવસ્તુઓના ભાવો વધી જશે. પેટ્રોલનો ભાવ વધારો સામાન્ય માણસ માટે સમસ્યા લઈને આવ્યો છે. સામાન્ય માણસના ઈંધણના બજેટ હવે વેરવિખેર થઈ જવાના છે.

સરકાર કોરોનાના ખર્ચને પહોંચી વળવા આ ભાવ વધારો કરાયો હોવાનું બહાનુ આપે છે પરંતુ સરકારની નજરમાં માત્ર ઈંધણ જ કમાઉ દિકરો હોય તેવુ જણાય છે. ઈંધણના ભાવની વ્યાપક અસરો થતી હોવાની જાણ છતા સરકાર ઈંધણ મોંઘુ કરી રહી હોવાથી પ્રજામાં ભયંકર રોષની લાગણી પ્રગટી છે. વાહન ચલાવવાનું અત્યારે આવશ્યક થઈ ગયુ હોવાથી પેટ્રોલ જરૂરી બન્યુ છે અને તેના ભાવ વધતા પ્રજાને હવે વધુ ભાવ ચુકવવા પડશે તેનાથી નારાજી ફેલાઈ છે.

પ્રજા પૂછી રહી છે કે સરકાર પોતાના કેડ પર આવેલો બોજો પ્રજાની કેડે ઠોકી બેસાડે તે કેટલા અંશે વ્યાજબી છે ? લોકોની માંગણી છે કે સરકાર તૂર્ત પુનઃ વિચાર કરવો જોઈએ.