Gujarati News

મુંબઇ તા. ૧પ :.. દેશમાં ટ્રેન-સર્વિસમાં થતા ગુનાને લગતી રેલવેની અમુક આશ્ચર્યજનક માહિતી વિશે જાણવા મળ્યું છે, જેમાં ટ્રેનોમાં ચોરી થવા વિશે મહારાષ્ટ્ર દેશભરમાં મોખરે છે. અને મધ્ય પ્રદેશ બીજા સ્થને છે. ગુજરાત, દિલ્હી અને તામિલનાડુનો મોખરાનાં પાંચ રાજયોમાં સમાવેશ છે. આ વિશે નેશનલ ક્રાઇમ રેકોર્ડ બ્યુરોએ તાજેતરમાં પ્રકાશિત કરેલા એક અહેવાલમાં રજૂઆત કરી છે. જો કે એમાં યુપીમાં ટ્રેનમાં ચોરીનાં કિસ્સા વિશે જાણકારી આપવામાં આવી નથી. અહેવાલ પ્રમાણે ટ્રેનમાં ચોરીના ૭૪,૦૦૦ કેસ નોંધાયા છે, જેમાં લગભગ ૧પ૭ કરોડની સંપતિ ચોરાઇ હોવાનું જાણવા મળ્યું હતું.

બે વર્ષમાં ૪પ% પ્રમાણ વધ્યું

નેશનલ ક્રાઇમ રેકોર્ડ બ્યુરોના અહેવાલ અનુસાર દેશમાં ટ્રેનોમાં આચરવામાં આવતા ગુનામાં બે વર્ષમાં લગભગ ૪પ ટકા જેટલો વધારો થયો છે. અહેવાલ પ્રમાણે ર૦૧૭ માં ટ્રેનમાં ૧૧ લાખ કરતાં વધારે ગુના થયા હતાં. એમાં ૭૦ ટકા કરતાં વધુ ચોરી અને લૂંટફાટને લગતા બનાવ બન્યા હતાં. ર૦૧૭ માં રેલ્વેમાં ચોરીના ૭૪,૩૧૭ કેસ નોંધાયા હતાં. જેમાં ૧ર,૦૦૦ કરતાં વધુ મેટ્રો રેલને લગતા હોવાનું સામે આવ્યું છે.