Gujarati News

નવી દિલ્હી તા. ૧૨ : લોકડાઉન વચ્ચે સરકાર વધુ એક રાહત હોમબાયર્સને આપવા જઇ રહી છે. સરકાર સસ્તા વ્યાજદરની હોમલોન સ્કીમ ફરીથી શરૂ કરવા જઇ રહી છે. આ સ્કીમ હેઠળ અમુક નિશ્ચિત આવકવાળાઓને હોમલોનના વ્યાજ પર સબસીડી આપવામાં આવે છે.

સૂત્રો અનુસાર, સોમવારે આ યોજનાને નાણા મંત્રાલય તરફથી લીલીઝંડી મળી ગઇ છે. હવે તેને કેબિનેટમાં રજૂ કરવામાં આવશે, ત્યાં મંજૂરી મળી ગયા પછી તેની જાહેરાત કરવામાં આવશે. એક સરકારી અધિકારીએ જણાવ્યું કે, આ સ્કીમ ૩૧ માર્ચ ૨૦૨૦થી બંધ થઇ ગઇ હતી, ત્યારથી તેને ફરીથી ચાલુ કરવા માટે મીટીંગો થઇ રહી હતી. આ સ્કીમ હેઠળ સરકાર હોમ લોન પર સબસીડી આપે છે એટલે આ સ્કીમમાં નાણા મંત્રાલયની મંજૂરી જરૂરી છે. નાણા મંત્રાલયે આ બાબતે રિઝર્વ બેંક અને બેંકોના પ્રમુખો સાથે વાતચીત કરી હતી. તેમની સહમતી પછી આના માટે અલગ ફંડની જોગવાઇ કરવી પણ જરૂરી છે. આ સ્કીમ કેટલા વર્ષો માટે શરૂ કરવી તેનો નિર્ણય કેબીનેટની મીટીંગમાં થશે.