Gujarati News

ફરિદાબાદ, (હરિયાણા) : તા.૧૦:  રાજયના ફરિદાબાદમાંથી એક ચોંકાવનારા સમાચાર જાણવા મળ્યા છે. અહીં પોલીસ સ્ટેશનના વેરહાઉસમાંથી ૨૯ હજાર લીટર દારૂ બોટલો અને કન્ટેનરમાંથી ગાયબ થઈ ગયો છે. પોલીસનું કહેવું છે કે આ કામ ઉંદરોનું છે. ઉંદરોએ દારૂની સાથે-સાથે ગાંજા અને અફીણ જેવા માદક પદાર્થોના ડબ્બા અને પોટલી પણ કોતરી ખાધા છે.

પોલીસના આંકડા મુજબ, ગત વર્ષે તમામ પોલીસ સ્ટેશનોમાંથી આશરે ૫૩,૪૭૩ લીટર દેશી દારૂ, ૨૯,૯૯૫ લીટર અંગ્રેજી દારૂ, ૨૮૦૪ કેન બીયર અને ૮૦૫ લીટર કાચો દારૂ જપ્ત કર્યો હતો. આ સમગ્ર દારૂ શહેરના તમામ પોલીસ સ્ટેશનોમાં નોંધાયેલા ૮૨૪ કેસો હેઠળ જપ્ત કરાયો હતો. આ દારૂને શહેરના વિવિધ પોલીસ સ્ટેશનોમાંથી જપ્ત કરીને વેરહાઉસમાં રાખવામાં આવ્યો હતો. પણ, ઉંદરો આ દારૂ ગટગટાવી ગયા.

પોલીસના સૂત્રોનું માનીએ તો ઉંદરોએ સૌથી વધારે દેશી દારૂની બોટલો કોતરી છે. જેની પાછળનું કારણ એવું છે કે દારૂની આ બોટલો પ્લાસ્ટિકની હોય છે. જયારે કાચા દારૂને પણ પ્લાસ્ટિકના કન્ટેનરમાં રાખવામાં આવે છે. તેવામાં ઉંદરોએ તેને વધારે નુકસાન પહોંચાડ્યું છે. આંકડા મુજબ, ઉંદરો દેશી અને કાચો દારૂ એમ મળીને આશરે ૨૦ હજાર લીટર દારૂ ગટગટાવી ગયા છે અને ઉંદરોએ તે કોતરી ખાધું હોવાથી ઘણો દારૂ વહી ગયો છે. જયારે અંગ્રેજી દારૂની બોટલોના ઢાંકણા કાપીને ઉંદરોએ આશરે ૯ હજાર લીટર જપ્ત દારૂ ગાયબ કરી દીધો છે.

આ અગાઉ બિહારના ઉંદરો પણ મીડિયામાં ચર્ચાનો વિષય બન્યા હતા. બિહારના વિવિધ પોલીસ સ્ટેશનોમાંથી લાખો લીટર દારૂ ઉંદરો ગટગટાવી ગયા અને નુકસાન કર્યું હતું. બિહારમાં પોલીસે મોટા જથ્થામાં દારૂ જપ્ત કર્યો હતો. જયારે દારૂનું પ્રમાણ ઓછું જોવા મળ્યું ત્યારે તપાસ માટે આદેશ આપવામાં આવ્યો હતો. જયારે દારૂનો યોગ્ય હિસાબ નહીં મળતા આ દારૂ ઉંદરો પી ગયા હોવાનું અથવા નુકસાન કર્યાં હોવાનું કહેવામાં આવ્યું હતું.