Gujarati News

સુરતમાં દિવસેને દિવસે તાપમાનમાં વધારો જોવા મળે છે શહેરમાં વધતા જતા વાહનોના કારણે વાતાવરણમાં પ્રદૂષણ અને રસ્તા પર થતા અકસ્માતોની સંખ્યામાં  વધારો થયો છે. વાતાવરણમાં વધતા જતા પ્રદૂષણને અટકાવવા માટે અને રસ્તા પર થતા અકસ્માતની ઘટનાઓમાં ઘટાડો કરવા માટે સુરત પોલીસ દ્વારા એક મહત્ત્વપૂર્ણ નિર્ણય લેવામાં આવ્યો છે.

  સુરતમાં આજથી દિવસ દરમિયાન શહેરમાં પ્રવેશ કરતા ભારે વાહનો પર પ્રતિબંધ મુકવામાં આવ્યો છે. ભારે વાહનો સવારના 7 વાગ્યાથી રાત્રે 11 વાગ્યા સુધીના સમયગાળા દરમિયાન શહેરમાં પ્રવેશ કરી શકશે નહીં. આ નિર્ણય સુરત પોલીસ કમિશનર દ્વારા બહાર પાડવામાં આવ્યો છે.

  આ પ્રતિબંધમાં કેટલાક વાહનોને છૂટછાટ આપવામાં આવી છે. જેમ કે, સ્કૂલ બસ, કેટલીક કંપનીઓની બસ, શાકભાજીના ટ્રક, દવા અને દૂધના ટેન્કર સહિત જીવન જરૂરીયાતવાળી વસ્તુઓ ભરેલા વાહનોને પ્રવેશ આપવામાં આવશે.

  સુરત પોલીસના નિર્ણયના કારણે 7500 કિલોગ્રામથી ઓછું વજન ધરવતા ખાલી વાહનોને શહેરમાં પ્રવેશ પર છૂટ આપવામાં આવી છે. જો વાહનનું વજન 7500 કિલોગ્રામથી વધારે હશે તો તે વાહનને પ્રવેશ આપવામાં આવશે નહીં.