Gujarati News

અમદાવાદ, તા.૨૭ : સોશિયલ મીડિયામાં છોકરીના નામે ફેક એકાઉન્ટ બનાવી વિડીયો કોલ કરીને યુવકોના અશ્લીલ વિડીયો બનાવી તેમની પાસેથી ખંડણી માગવાના કિસ્સાઓ વધી રહ્યા છે. આવો જ એક ચોંકાવનારો કિસ્સો IIMના વિદ્યાર્થીનો સામે આવ્યો હતો. આ ઉપરાંત રાધનપુર ખાતે રહેતાં વિદ્યાર્થીનો ન્યૂડ વિડીયો બનાવતાં યુવકે નદીમાં ઝંપલાવી મોત વ્હાલું કર્યું હતું. જો કે, આ મામલે તપાસ કરતાં સાયબર સેલે હરિયાણાના મેવાતથી એક આરોપી અખલક અહેમદ અબ્દુલાખાનની ધરપકડ કરી લીધી હતી. પોલીસને આરોપી પાસેથી છોકરીઓના ૧૨ ફેક એકાઉન્ટ અને ૬૪ જીબી જેટલો ડેટા મળી આવ્યો હતો. આરોપી છોકરીના નામે ફેક એકાઉન્ટ બનાવી યુવકો સાથે ચેટિંગ કરી તેમને વિડીયો કોલ કરતાં હતા. અને વિડીયો કોલ પર ન્યૂડ વિડીયો બનાવી બ્લેકમેઈલ કરી પૈસા ખંખેરતા હતા.

ઘટનાની વિગતમાં વાત કરીએ તો, IIMના વિદ્યાર્થીએ સાયબર સેલમાં ફરિયાદ કરી હતી કે, તેનો ન્યૂડ વિડીયો બનાવી આરોપીએ ત્રણ લાખ રૃપિયા ખંખેરી લીધા હતા. સાયબર સેલે ફરિયાદના આધારે સઘન તપાસ કરી હરિયાણાના મેવાત ગામના રહેવાસી અખલક અહેમદ અબ્દુલાખાનની ૧૦ ફેબ્રુઆરીના રોજ ધરપકડ કરી હતી અને તેની પાસે મોબાઈલ ફોન સહિતનો સામાન જપ્ત કર્યો હતો. અખલકે સોનુ નામે છોકરીનું ફેક એકાઉન્ટ બનાવી IIMના વિદ્યાર્થીનો ન્યૂડ વિડીયો બનાવ્યો હતો. અને વિડીયો વાયરલ કરી દેવાની ધમકી આપી તેની પાસેથી પૈસા ખંખેર્યા હતા. પોલીસને અખલક પાસેથી છોકરીઓનાં ૧૨ ફેક એકાઉન્ટ મળી આવ્યા હતા. એટલું જ નહીં ૬૪ જીબી જેટલાં ન્યૂડ વિડીયો પણ મળી આવ્યા હતા. આમ અખલક દ્વારા અનેક યુવકોને પોતાની જાળમાં ફસાવી પૈસા ખંખેરતો હોવાનું સામે આવ્યું હતું. પોલીસ તપાસમાં બીજી પણ ચોંકાવનારી વિગત સામે આવી હતી કે, અખલકે રાધનપુરના એક યુવકનો પણ ન્યૂડ વિડીયો બનાવ્યો હતો. બ્લેકમેઈલ કરાતાં આ યુવકે નદીમાં ઝંપલાવી આપઘાત કરી લીધો હતો.

પોલીસ તપાસમાં એ પણ સામે આવ્યું હતું કે, અખલક સામે હરિયાણા અને તેલંગાણામાં પણ કેસો નોંધાયા છે. આ ઉપરાંત રાજસ્થાન હરિયાણાની સીમા પર રહેતો સદામ ઉર્ફે કાલા નામના આરોપી પાસેથી અખલક કમિશન પર બેંક ખાતા અને તેનો પાસવર્ડ મેળવી લેતો હતો. પોલીસે સદામને ઝડપી પાડવા માટે ચક્રો ગતિમાન કર્યાં છે. ઉલ્લેખનીય છે કે, આરોપી હરિયાણાના મેવાતનો વતની છે, અને ત્યાં તેમજ આસપાસના ગામનાં લોકો આ રીતે ઓનલાઈન ફ્રોડના ગુનાઓમાં સંકળાયેલા છે.