Gujarati News

વલસાડ, તા.૨૬: ગુજરાત સહિત દેશભરમાં કોરોના લોકડાઉનનો ચોથો તબક્કો ચાલી રહ્યો છે. ગુજરાતમાં નોન કન્ટેન્મેન્ટ ઝોનમાં કેટલીક છૂટછાટો આપી છે. તેમજ સાંજે ૭ વાગ્યથી સવાર ૭ વાગ્યા સુધી કફર્યુ જાહેર કરવામાં આવ્યું છે. ત્યારે પારડીમાં રહેતો યુવક પ્રેમિકાને મળવા માટે રાત્રે અઢી વાગ્યે લેડિઝ ડ્રેસ પહેરીને સ્કૂટર પર નીકળ્યો હતો. રાત્રિ દરમિયાન કફર્યુ હોવાથી પેટ્રોલિંગ કરતી પોલીસે અટકાવીને પૂછપરછ કરી હતી. પોલીસે તપાસ કરતા યુવતી નહીં પરતુ યુવક હોવાનું સામે આવ્યું હતું.

મીડિયા રિપોર્ટ મુજબ પારડીમાં મોતીવાડા વિસ્તારમાં રહેતો ૧૯ વર્ષીય યુવક પારડી પરિયા રોડ ભેંસલાપાડામાં રહેતી યુવતી સાથે પ્રેમસંબંધ હતો. પરંતુ કોરોના લોકડાઉનને કારણે બંને છેલ્લા દ્યણા સમયથી એકબીજા સાથે મળી શકયા નહોતા. એટલે ભાવેશને વિરહ સહન ન થતા પ્રેમિકાને કોઈ પણ ભોગે મળવાનું નક્કી કર્યું હતું. પરંતુ પોલીસ અને યુવતીના પરિવારને ચકમો આપવા માટે તેણે પંજાબી ડ્રેસ પહેરીને સ્કૂટર પર નીકળી પડ્યો હતો.

લગભગ રાત્રે અઢી વાગ્યે યુવક પ્રેમિકાને મળવા માટે નીકળ્યો હતો. રાત્રિ દરમિયાન કરફ્યુ હોવાને કારણે પ્રેમિકાને મળે તે પહેલા જ પોલીસે તેને રોકી લીધો હતો. પોલીસે પૂછપરછ કરતા યુવકનો ભાંડો ફૂટી ગયો હતો. પારડી પોલીસે વધુ તપાસ કરતા યુવકે તેની પ્રેમિકાને મળવા લેડિઝ ડ્રેસ પહેર્યો હોવાનો ખુલાસો કર્યો હતો. ઉલ્લેખનીય છે કે, અગાઉ પણ આવા અનેક કિસ્સાઓ બન્યા છે જેમાં પ્રેમિકાને મળવા માટે પ્રેમી અથવા પ્રેમીને મળવા માટે પ્રેમિકા આ રીતના તરીકાઓ અપનાવતા હોવાનું સામે આવ્યું છે.