Gujarati News

આણંદ: શહેરની ગ્રીડ ચોકડી પાસે આવેલા મુફ્તિ કપડાના શો-રૂમમાં મેનેજર તરીકે ફરજ બજાવતા આણંદના શખ્સે છેલ્લા છ મહિના દરમ્યાન કપડાંના વેચાણના ૨.૫૦ લાખ રૂપિયા રોકડા તેમજ પોતાના ખાતામાં જમા કરાવીને છેતરપીંડી તેમજ વિશ્વાસઘાત કરતાં આ અંગે આણંદ શહેર પોલીસે ગુનો દાખલ કરીને તપાસ હાથ ધરી છે.

મળતી વિગતો અનુસાર ગ્રીડ ચોકડી પાસે મુફ્તિ કપડાંનો શો-રૂમ આવેલો છે. જેમાં મેનેજર તરીકે આણંદના સાગર એપાર્ટમેન્ટમાં રહેતો સન્ની ચન્દ્રપ્રકાશ શેટ્ટીને રાખવામાં આવ્યો હતો. જે કેસ કલેક્ટ કરવાનું કામ કરતો હતો. ગત ૫-૨-૨૦ના રોજ સન્ની શેટ્ટી દુકાનેથી એકદમ ગાયબ થઈ ગયો હતો જેથી ફરિયાદી ધર્મેન્દ્રભાઈ અમરતભાઈ પવારે દુકાને આવી તપાસ કરતાં સન્નીએ છેલ્લા છ મહિના દરમ્યાન દુકાનના કપડાંના વેચાણના રૂપિયા રોકડા લઈને તેમજ પેટીએમનું ઈડીસી મશીન પોતાનું રાખીને પોતાના એકાઉન્ટ સાથે લીંક કરી કુલ ૨.૫૦ લાખની છેતરપીડી અને વિશ્વાસઘાત કર્યો હોવાનું ખુલવા પામ્યું હતુ.