Gujarati News

ગાંધીનગર: આ કિસ્સો સંસ્કારી નગરી ગણાતા ગાંધીનગરની નજીક આવેલા કોલવડાની આયુર્વેદિક કોલેજનો છે જ્યાં પોતાનાથી અડધી ઉંમરની પોતાની જ વિદ્યાર્થિનીને એક તરફી પ્રેમમાં અંધ પ્રોફેસર કોઇ પણ વાતની ચિંતા કર્યા વગર એક નહિ પણ બે બે વાર પ્રપોઝ કરે છે. આ અંગે મળતી માહિતી પ્રમાણે કોલવડા આયુર્વેદિક કોલેજમાં પ્રધ્યાપક તરીકે ફરજ બજાવતા આશરે ૫૦ વર્ષના પ્રધ્યાપકે ૪ મહિના પહેલા ૨૧ વર્ષિય યુવતી કે જે આ જ કોલેજમાં આ પ્રધ્યાપકના હાથ નીચે ભણે છે  તેને પ્રપોઝ કર્યું હતું. તે વખતે વિદ્યાર્થિનીએ પોતાના વાલીને આ બાબતની જાણ કરતાં તેઓ કોલેજમાં આવી પહોંચ્યા હતા અને આ પ્રોફેસર સામે કાર્યવાહી કરવા માટે કોલેજના સત્તાધીશોને રજૂઆત કરી હતી પરંતુ તે વખતે ફક્ત માફીપત્ર લખાવીને આ લંપટ લેક્ચરરને છોડી મૂકવામાં આવ્યો હતો એટલું જ નહીં આ જ કોલેજમાં તેને ફરી ચિકિત્સાના પ્રોફેસર તરીકે ફરજ ઉપર પણ રાખવામાં આવ્યો હતો. ત્યારે આ એક તરફી પ્રેમમાં અંધ બનેલા પ્રોફેસરે ફરી પોત પોકાર્યું હતું અને ૩ દિવસ પહેલા કોલેજમાં જ અન્ય વિદ્યાર્થીઓની હાજરીમાં ફરી એકવાર આ વિદ્યાર્થિનીને પ્રપોઝ કર્યું હતું.

કોલેજમાં જ અને અન્ય વિદ્યાર્થીઓની વચ્ચે આ લંપટ લેકચરરે પોતાનાથી અડધાથી પણ ઓછી ઉંમરની વિદ્યાર્થિનીને 'હું તને પ્રેમ કરૂં છું...મારા સપનામાં તું જ આવે છે.. હું તારા માટે જ અત્યાર સુધી કુંવારો રહ્યો છું...મારી સાથએ લગ્ન કરીશ ..!!?' એમ કહીને પ્રપોઝ કર્યું હતું. આ આધેડવયના પ્રોફેસરે પોતાની જ વિદ્યાર્થીને લગ્ન માટે પ્રપોઝ કરતાની સાથે ત્યાં હાજર અન્ય વિદ્યાર્થિનીઓ - વિદ્યાર્થીઓ રોષે ભરાયા હતા અને આ લંપટ લેકચરરને એક રૂમમાં પૂરીને મેથીપાક ચખાડયો હતો. હવે આ એક તરફી પ્રેમમાં અંધ પ્રોફેસર જાણે કંઇ બન્યું જ ના હોય તેવી રીતે વર્તે છે અને ભર્યા કૂવામાંથી કોરો નીકળવા માટે બદલી કરવા મથી રહ્યો છે. તો બીજી બાજુ વિદ્યાર્થિનીએ પણ આ પ્રોફેસરની કરતુતો બાબતે કોલેજના પ્રિન્સિપાલ સહિત ઉચ્ચકક્ષાએ લેખિતમાં ફરિયાદ કરી હોવાનું જાણવા મળી રહ્યું છે ત્યારે આ લંપટ લેકચરને પાઠ ભણાવવા માટે તંત્ર કોઇ આકરા પગલાં ભરે છે કે ફરી માફીપત્ર લખાવી ફરિયાદીને મનાવી લેવામાં આવશે એ તો જોવું જ રહ્યુું.