Gujarati News

અમદાવાદઃ મહિલાએ અમેરિકાના કેલિફોર્નિયામાં રહેતા પોતાના પૂર્વ પતિ પર દુષ્કર્મ અને સૃષ્ટી વિરુદ્ધના કૃત્યનો આરોપ મુક્યો છે. તેણે આરોપ મુક્યો કે ડિવોર્સ લઈ લીધા પછી પણ પૂર્વ પતિએ તેને ભોળવીને એક વર્ષ સુધી સંબંધ બાંધ્યા હતા. 46 વર્ષીય મહિલા હાલ વડોદરામાં એકાઉન્ટન્ટનું કામ કરે છે.

પોતાના NRI પતિ વિરુદ્ધ વડોદરમાં ફરિયાદ કરતા મહિલાએ આરોપ મૂક્યો કે ડિવોર્સ બાદ ફરી પોતાની સાથે મેરેજ કરશે તેવા ખોટા વચન આપી તેના પૂર્વ પતિએ તેનું શારીરિક શોષણ કર્યું છે. જ્યારે તેના પૂર્વ પતિએ પત્ની સામે FIR નોંધાવતા કહ્યું કે, ‘જ્યારે તેની પત્નીને ખબર પડી કે પોતે બીજા મેરેજ કરી રહ્યો છે ત્યારે તેની પત્ની આ રીતે ખોટા આરોપ મુકીને તેની કનડગત કરી રહી છે.’

વડોદરા મહિલા પોલીસ સ્ટેશનમાં ફરિયાદ નોંધાયા બાદ મહિલાના અમેરિકન નાગરિક એવા પૂર્વ પતિએ ગુજરાત હાઈકોર્ટમાં અપીલ કકરી હતી. જેના આધારે કોર્ટે પોલીસને તપાસ કરવાની મંજૂરી તો આપી પરંતુ પૂર્વ પતિની ધરપકડ કરવાની મનાઈ ફરમાવી હતી. આ સાથે જ કેસની વિચિત્રતા જોઈને હાઈકોર્ટ બંનેને સમાધાન કરવા જણાવ્યું હતું. જોકે એક્સ કપલ કોઈપણ જાતના સમાધાન પર આવી શક્યું નહોતું. આ દરમિયાન પોલીસે પૂર્વ પતિ વિરુદ્ધ ગત મહિને ચાર્જશિટ ફાઇલ કરી દીધી હતી. જે બાદ હાઈકોર્ટે પૂર્વ પતિની ટ્રાયલ કોર્ટમાંથી ડિસ્ચાર્જ માટેની અરજીને માન્ય રાખતા આ મહિનાની શરુઆતમાં જ કેસને નિકાલ કરી દીધો હતો.

મહિલાની ફરિયાદ અનુસાર 1996માં તેના લગ્ન અમેરિકાના નાગરિક એવા મૂળ ગુજરાતી પતિ સાથે થયા હતા. લગ્નના 6 મહિના બાદ તે પણ પતિ પાસે રહેવા અમેરિકા જતી રહી હતી. જે બાદ 2007માં બંને એક બાળકીના પેરેન્ટ્સ બન્યા હતા. પાછળથી લગ્ન જીવનમાં ભંગાણ પડતા કપલે 2015માં અમેરિકન કોર્ટમં છૂટાછેડા લીધા હતા. ત્યાર બાદ તેના પૂર્વ પતિએ મહિલાને કથિત રીતે લલચાવી ભોળવીને એક વર્ષ સુધી પોતાની સાથે જ રાખી હતી અને અને આ દરમિયાન અનેકવાર તેની સાથે શારીરિક સંબંધ બાંધ્યો હતો.

મહિલાએ આરોપ મુકતા કહ્યું કે, તેના પૂર્વ પતિએ ડિવોર્સ બાદ તેને કહ્યું હતું કે આ છૂટાછેડા ફક્ત તેની મમ્મીને ખૂશ કરવા માટે લીધા છે. પોતે ફરીથી તેની સાથે મેરેજ કરશે આવું કહીને એક વર્ષ અમેરિકા અને ત્યાર બાદ મહિલા વડોદરા આવી ગયા બાદ પણ તેનો પૂર્વ પતિ તેના ઘરે આવતો હતો અને સંબંધ બાંધતો હતો. આ ઉપરાંત મહિલાએ પોતાને જીવનું જોખમ હોવાનો પણ આરોપ મુક્યો હતો. જોકે બચાવ પક્ષના વકીલે મહિલાના તમામ દાવાઓને ફગાવી દીધા હતા.