Gujarati News

અમદાવાદ : શહેરનાં (Ahmedabad) નરોડા પોલીસસ્ટેશનમાં એક સગીરાએ (minor)  તેના જ સંબંધી યુવક સામે ફરિયાદ નોંધાવી છે. સગીરાનો આક્ષેપ છે કે, આ યુવકે સગીરાને ધમકી આપી હતી કે, તેના દાદા સાથેના ફોટો મોર્ફ કરી બિભત્સ ફોટો બનાવી તેને બદનામ કરશે. આવી ધમકીઓ આપી યુવકે અવારનવાર સગીરા સાથે શારીરિક સંબંધો બાંધ્યા હતા. નરોડા પોલીસ સાબરકાંઠાનાં આ યુવકની તપાસ હાથ ધરી છે.

મૂળ સાબરકાંઠાની 18 વર્ષીય સગીરાનાં માતા પિતાનું અવસાન થયું હોવાથી તે નરોડામાં તેના કાકા કાકી અને દાદા દાદી સાથે રહે છે. માર્ચ 2019માં આ સગીરાનો સંબંધી રાહુલ પણ સાબરકાંઠાથી અમદાવાદ પ્લમ્બિંગનું કામ કરવા આવ્યો હતો. તેણે પણ નરોડામાં ભાડે મકાન રાખ્યું હતું. સંબંધી હોવાથી એકબીજાના ઘરે આવવા જવાનું થતું રહેતું હતું.

થોડા સમય બાદ આ રાહુલે સગીરાના અને તેના દાદાના ફોટો ફોનમાં બતાવ્યા હતા અને કહ્યું કે તમારા બંનેના ખરાબ ફોટો બનાવી તે વોટ્સએપ પર વાયરલ કરી દેશે. આ પ્રકારની ધમકી આપી અવાર નવાર રાહુલ સગીરા ને ગેસ્ટ હાઉસમાં બોલાવતો હતો. ગેસ્ટ હાઉસમાં બોલાવી તે સગીરા સાથે શારીરિક સંબંધ બાંધતો હતો.

એકતરફ સગીરા ડરી ગઇ હતી પણ બીજીબાજુ તેણે હિંમત એકઠી કરી તેના કાકીને આ વાત કરી હતી. કાકીએ તેમના સાસુ સસરાને આ વાત કરતા રાહુલનાં પરિવારને બોલાવી સમાધાન કરી વાતચીત કરવા ભેગા થયા હતા. પણ ત્યાં રાહુલે સગીરાનાં દાદા સાથે મારામારી કરી ધમકીઓ આપી ત્યાંથી ભાગી ગયો હતો. આખરે દાદાને માર મારતા સગીરાથી સહન ન થયું. જેણે તે બાદ નરોડા પોલીસનો સંપર્ક સાંધી રાહુલ સામે આઇપીસી 376 (2)(એન), 323, 294ખ, 506 (2), 114 અને પોક્સો એક્ટ મુજબ ફરિયાદ નોંધી તપાસ હાથ ધરી છે.