Gujarati News

અમદાવાદ, તા.૧૩ : કેટલાય સમાજમાં આજે પણ સાટા પદ્ધતિથી લગ્ન કરાવવામાં આવે છે. આવા લગ્નમાં એક દંપતીના સંબંધો બગડે તો તેની સાથે ચાર જિંદગીઓ બરબાદ થાય છે. એટલે જ ક્યારેક પતિ કે પત્ની મૂંગા મોંઢે સહન કરી લેતાં હોય છે. એક સમય એવો આવે છે જ્યારે સહનશીલતાની હદ પાર થઈ જાય છે. આવો જ કિસ્સો અમદાવાદમાં સામે આવ્યો છે. જ્યાં ૨૭ વર્ષીય મહિલાએ પતિ સામે શારીરિક અને માનસિક ત્રાસ ગુજારવાની ફરિયાદ નોંધાવી છે. લગ્નેત્તર સંબંધની શંકા રાખીને પતિ તેને ત્રાસ આપતો હતો. છેવટે મહિલાએ મંગળવારે પતિ સામે ઘરેલુ હિંસાની ફરિયાદ નોંધાવી છે.

મહિલાએ સોલા પોલીસને જણાવ્યું કે, ૨૨ ફેબ્રુઆરી ૨૦૧૫ના રોજ તેના લગ્ન મહેસાણા જિલ્લાના બેચરાજી તાલુકાના દેથલી ગામના યુવક સાથે થયા હતા. મહિલાના લગ્ન સાટા પદ્ધતિથી થયા હતા, જે મુજબ તેના ભાઈના લગ્ન પતિની બહેન સાથે કરાવવામાં આવ્યા હતા.

લગ્નના સાત મહિના બાદ મારા પતિ અને સાસુ-સસરાએ નાની-નાની વાતે કજિયો કરવાનું શરૂ કર્યું. મારા પતિ પાસે નોકરી નહોતી અને હું જ્યારે તેની પાસે રૂપિયા માગતી ત્યારે તે મને માર મારતો ને કહેતો કે મારા મા-બાપ પાસેથી રૂપિયા માગી લાવું. મારા લગ્ન સાટા પદ્ધતિથી થયા હોવાથી મારા ભાઈનું ઘર ના ભાંગે તે માટે હું ચૂપ રહી, તેમ મહિલાએ ફરિયાદમાં જણાવ્યું.૨૫ ઓગસ્ટ ૨૦૧૬ના રોજ આ મહિલાએ પ્રથમ સંતાનને જન્મ આપ્યો હતો. મહિલા એ વખતે પોતાના પિયરમાં હતી અને ડિસેમ્બર ૨૦૧૮ સુધી અહીં જ રહી હતી કારણકે તેનો પતિ કે સાસરીમાંથી બીજું કોઈ તેને લેવા ના આવ્યું. મહિલાનો આરોપ છે કે, સમાજના વડીલોએ મધ્યસ્થી કરતાં પતિ તેને લેવા આવવા તૈયાર થયો હતો.

બાદમાં મહિલાના પતિએ તેના ભાઈની ઈલેક્ટ્રિકની દુકાનમાં નોકરી શરૂ કરી હતી. જોકે, થોડા સમયમાં જ તેણે નોકરી છોડી દીધી. મહિલાએ આરોપ લગાવ્યો કે, *મારો પતિ શંકા કરવા લાગ્યો કે મારું મારા મામા અને કઝિન સાથે અફેર છે. આ કારણે તે મને ખૂબ મારતો હતો. જ્યારે મેં આ વાત મારા સાસુ-સસરા સમક્ષ મૂકી ત્યારે તેમણે પણ દીકરાનો પક્ષ લીધો અને મને ત્રાસ આપવા લાગ્યા.*

મહિલાએ પોલીસને કહ્યું, મારા પરિવાર અને સમાજના વડીલોએ પતિને સમજાવવાનો પ્રયાસ કર્યો કે મારી સાથે મારઝૂડ ના કરે કે ત્રાસ ન આપે. પરંતુ તે ના સુધર્યો અને નાની-નાની વાતે મારવા લાગ્યો હતો. ૨૦૨૧માં હું મારા બાળક સાથે પિયરમાં રહેવા આવી ગઈ. છેવટે આ મહિલાએ સોલા પોલીસ સ્ટેશનમાં જઈને પતિ અને સાસુ-સસરા સામે ઘરેલુ હિંસા, હાનિ પહોંચાડવાની અને ઉશ્કેરણીની ફરિયાદ નોંધાવી છે.