Gujarati News

આણંદ : આણંદ પાસેના સામરખા ગામની હારીયા તલાવડી નજીક ઓચીંતો છાપો મારી આણંદ ગ્રામ્ય પોલીસની ટીમે વિદેશી દારૂનો જથ્થો ઝડપી પાડયો હતો. જો કે પોલીસના દરોડાની ગંધ આવી જતા બે શખ્સો ઘટના સ્થળેથી ફરાર થઈ જવામાં સફળ રહ્યા હતા. પોલીસે કુલ્લે રૂા.૫૭ હજાર ઉપરાંતનો મુદ્દામાલ કબ્જે લઈ બે શખ્સો વિરુધ્ધ પ્રોહીબીશન એક્ટ હેઠળ ગુનો નોંધી કાયદેસરની કાર્યવાહી હાથ ધરી છે.

પોલીસ સૂત્રો પાસેથી મળતી માહિતી મુજબ સામરખા ગામે રહેતો રાજદીપ ઉર્ફે મોન્ટુ પ્રકાશ ગોરધનભાઈ પરમાર અને વર્ષલ ઉર્ફે ભુટો વિજયભાઈ પરમાર ભેગા મળી એક નંબરપ્લેટ વગરના ટુવ્હીલર ઉપર વિદેશી દારૂની હેરાફેરી કરી વેચાણ કરતા હોવાની અને વિદેશી દારૂનો જથ્થો હારીયા તલાવડી નજીક ઝાડી-ઝાંખરામાં છૂટો છવાયો રાખેલ હોવાનું તથા બંને શખ્સો ટુ-વ્હીલર ઉપર વિદેશી દારૂનો જથ્થો લેવા તલાવડી ખાતે ગયા હોવાની ગુપ્ત બાતમી આણંદ ગ્રામ્ય પોલીસને મળી હતી. જેથી પોલીસની ટીમે બાતમીવાળા સ્થળે ઓચિંતો છાપો માર્યો હતો. દરમ્યાન હારીયા તલાવડી ખાતેથી બંને શખ્સો પોલીસને જોઈ નાસી છૂટયા હતા. દરમ્યાન પોલીસે ઘટનાસ્થળે તપાસ કરતા ત્યાંથી એક ટુવ્હીલર મળી આવ્યું હતું જેની તલાશી લેતા એક્ટીવા પરથી એક મીણીયાના થેલામાં રાખેલ વિદેશી દારૂની બે નંગ બોટલ તથા બીયરના દસ ટીન મળી આવ્યા હતા. પોલીસે આજુબાજુના ઝાડીઝાંખરામાં તપાસ કરતા બીયરના સાત ટીન તેમજ વિદેશી દારૂની સાત બોટલો મળી આવી હતી. પોલીસે કુલ્લે રૂા.૭૧૦૦નો વિદેશી દારૂ તેમજ બીયરનો જથ્થો જપ્ત કરી ફરાર થઈ ગયેલ બંને શખ્સોને ઝડપી પાડવાના ચક્રો ગતિમાન કર્યા છે.