Gujarati News

અમદાવાદ, તા.૭ : અમદાવાદ શહેરમાં તા.૧૪મી જૂલાઇએ ભગવાન જગન્નાથજીની રથયાત્રા નીકળનાર છે ત્યારે રથયાત્રામાં અખાડાઓના આકર્ષણનું પણ બહુ મોટુ મહત્વ અને ઇતિહાસ છે. રથયાત્રામાં ૩૦થી વધુ અખાડાઓ જોડાશે અને અંગ કસરતના તેમ જ કલા-કૌશલ્યના અનોખા કરતબો શ્રધ્ધાળુઓ નાગરિકોને બતાવી ગજબનું આકર્ષણ જમાવશે. જો કે, આ વખતે વડાપ્રધાન નરેન્દ્ર મોદીએ દેશમાં ફીટનેસ ચેલેન્જનો જે સંદેશો વહેતો કર્યો છે તેને લઇ આ વર્ષની રથયાત્રામાં અખાડિયાને ફીટનેસની થીમ પર ખાસ કરતબો દર્શાવી રંગ જમાવશે. અખાડિયાનો દ્વારા હમ ફીટ તો, ઇન્ડિયા ફીટની થીમ પર માર્શલ આર્ટ્સ, કરાટે, બેલેન્સીંગ, કુશ્તી સહિતના અવનવા કરતબો કરી જાહેરજનતાને ફીટનેસનો અનોખો સંદેશો પણ આપશે.  ભગવાન જગન્નાથજીની રથયાત્રામાં વિવિધ અખાડાઓમાં વર્ષોથી અખાડિયનો તરીકે યુવાનો અને પુરૂષો જ કરતબો કરતા જોવા મળતા હતા પરંતુ હવે છેલ્લા બે વર્ષથી યુવતીઓ પણ અખાડાઓમાં કલા-કૌશલ્ય દર્શાવવા અખાડાઓમાં જોડાઇ રહી છે. આ વર્ષે પણ આઠથી દસ યુવતીઓ અનોખી કલા-કૌશલ્યનું પ્રદર્શન કરશે. રથયાત્રાના મહિનાઓ પહેલેથી અખાડિયનો અને કુસ્તીબાજો સવારે અને રાત્રે પોતાના કરતબો અને અંગ કસરતના દાવોની સખત અને સતત પ્રેકટીસ કરતા હોય છે, ત્યારે તેઓ તેમાં નિપુણતા હાંસલ કરી શકે છે. છેલ્લા ૫૦ વર્ષો ઉપરાંતથી રથયાત્રામાં જોડાતા રથયાત્રા અખાડા એસોસીએશનના પ્રમુખ મુકેશભાઇએ જણાવ્યું હતું કે, પહેલા ત્રણ-ચાર મહિના અગાઉ રથયાત્રાને લઇ અખાડાઓની તૈયારીઓ થતી હતી પરંતુ હવે યુવાનો નોકરી કરતા થયા હોઇ તેઓ રાત્રિના સમયે પણ કરતબોની પ્રેકટીસ કરે છે. આ વખતની રથયાત્રામાં અંગ કસરતના દાવ અને અવનવા કરતબો સાથે ૩૦થી વધુ અખાડાઓ જોડાશે. જેમાં ત્રણથી ચાર હજાર જેટલા અખાડિયનો, ભજનમંડળીઓ અને બેન્ડવાજા પણ સામેલ હશે. જેઓ સમગ્ર રથયાત્રા દરમ્યાન જોરદાર આકર્ષણ જમાવશે અને લોકોનો ઉત્સાહ અને ઉલ્લાસ વધારશે. રથયાત્રા દરમ્યાન સૌથી મહત્વના આકર્ષણો પોષણથી સોંયને ઉચકવી, છાતીથી સળિયાને વાળવા, ચક્રદાવ, બાણશૈય્યા, લાઠીદાવ, છાતી પર ૭૦થી ૧૦૦ કિલોના પથ્થર રાખી હથોડાથી તોડવા, શરીર પર પાટિયું રાખી મોટરસાયકલ ચલાવવી સહિતના જોખમી અને હૃદયના ધબકારા વધારી તેવા કરતબો જોવા મળશે. રથયાત્રાની સાથે સાથે આજે પણ અખાડાઓ, તેના અખાડિયનો અને તેમના અંગ કસરતના દાવો તેમ જ કરતબોનું એટલું જ આકર્ષણ યથાવત્ રહ્યું છે. રથાયાત્રાને લઈને ભારે ઉત્સુકતા છે.