Gujarati News

Gujarati News

News of Saturday, 7th July 2018

અલ્પેશ ઠાકોર, જિજ્ઞેશ મેવાણી અને હાર્દિક પટેલ સામે ગુનો દાખલ કરાયો

ગાંધીનગરના આદિવાડા ગામમાં એક મહિલાના ઘરમાં ઘૂસી જનતા રેડ કરતા

અમદાવાદ તા. ૭ : સોલામાં થયેલા લઠ્ઠાકાંડના પગલે ધારાસભ્ય અલ્પેશ ઠાકોર, જિજ્ઞેશ મેવાણી અને પાસના નેતા હાર્દિક પટેલે ગાંધીનગરનાં આદિવાડા ગામમાં એક મહિલાના ઘરમાં ઘૂસી જનતા રેડ કરતા ગાંધીનગર સેકટર-ર૧ પોલીસે ગુનો દાખલ કર્યો છે. પોલીસે અલ્પેશ ઠાકોર, જિગ્નેશ મેવાણી, હાર્દિક પટેલ સહિત છની વિરુદ્ઘમાં ગેરકાયદેસર મકાનમાં પ્રવેશી ખોટો આરોપ મૂકવાના મામલે ફરિયાદ કરી છે.સોલા ગામમાં બુધવારે થયેલા લઠ્ઠાકાંડ બાદ ધારાસભ્ય અલ્પેશ ઠાકોર, જિજ્ઞેશ મેવાણી, હાર્દિક પટેલ, મુકેશ ભરવાડ, ચેતન ઠાકોર, પ્રવીણ ભરવાડ સહિત ૧પથી વધુ વ્યકિત ગાંધીનગર એસ.પી. ઓફિસ સામે આવેલ આદિવાડા ગામમાં રહેતી કંચનબહેન મકવાણાના ઘરમાં ઘૂસી જનતા રેડ કરી હતી.

ટોળાં સાથે મળી રેડ પાડતા તેમાંથી બે દેશી દારૂની પોટલીઓ મળી હતી. આ મામલે પોલીસે તપાસ કરતા જાણવા મળ્યું હતું કે, આ રેડમાં આવેલા વિરમગામના એક યુવકે ચોરી-છૂપીથી દારૂની બે પોટલી કંચનબહેનના ઘરમાં મૂકી હતી.

હાર્દિક પટેલ, અલ્પેશ ઠાકોર અને જિજ્ઞેશ મેવાણી સહિત ૧પ થી વધુ વ્યકિતના વિરુદ્ઘમાં પોલીસે ગુનો દાખલ કરી તપાસ શરૂ કરી છે. કંચનબહેનનાં ઘરમાં ટોળું ઘૂસી ગયું હતું અને ખૂણે ખૂણે તપાસ કરી હતી. કંચનબહેને આજીજી અને કાકલુદી કરી હોવા છતા ત્રણેયે એક નહીં માનતા રેડ કરી હતી.

ઘટનાની વિગત એવી છે કે અલ્પેશ ઠાકોર, જિજ્ઞેશ મેવાણી અને હાર્દિક પટેલે ગાંધીનગર એસપી ઓફિસની સામે કંચનબહેન નામની મહિલાના ઘરમાં જનતા રેડ કરી હતી. તેમના ઘરમાંથી બે નાની થેલી દેશી દારૂની મળી આવી હતી.

આ ઘટના બાદ મહિલાએ એવો આક્ષેપ કર્યો હતો કે ધારાસભ્ય સાથે આવેલો એક છોકરો જાતે જ દારૂ લઇને આવ્યો હતો અને મારા ઘરમાં પ્રવેશવા પ્રયત્ન કર્યો હતો. આ ઘટના બાદ ગાંધીનગર પોલીસે પ્રવીણ ભરવાડ નામના યુવકની પૂછપરછ શરૂ કરી હતી.

ગાંધીનગર સેકટર-૨૧ના પોલીસ ઇન્સ્પેકટર વી.એન. યાદવે જણાવ્યું છે કે પ્રવીણ ભરવાડની પૂછપરછ બાદ મહિલાના ઘરમાંથી મળી આવેલી દારૂની બે પોટલીઓ ધારાસભ્ય સાથે આવેલા યુવકે મૂકી હોવાનું સામે આવ્યું હતું, જેમાં હાર્દિક પટેલ, જિજ્ઞેશ મેવાણી, અલ્પેશ ઠાકોર, મૂકેશ ભરવાડ, ચેતન ઠાકોર અને પ્રવીણ ભરવાડ વિરુદ્ઘમાં ગુનો દાખલ કર્યો છે. મળતી માહિતી મુજબ તમામ લોકો આજે સાંજે પોલીસ સ્ટેશનમાં હાજર થશે.

(4:16 pm IST)
  • દક્ષિણ ગુજરાતમાં દરિયાઇ પટ્ટામાં ભારેથી અતિભારે વરસાદની આગાહી કરવામાં આવી છે. સાથે સાથે દરિયાકાંઠે વસતા માછીવારોને દરિયો ન ખેડવા માટે પણ સૂચન કરાયું છે. ભારે આગાહી વચ્ચે વલસાડ, નવસારી, ડાંગ, તાપી, દમણમાં ભારે વરસાદની આગાહી કરવામાં આવી છે. સાથે સાથે વરસાદી માહોલ વચ્ચે વલસાડ અને વાપી સહિતાના અનેક વિસ્તારોમાં વીજળીના કડાકા સાથે તોફાની વરસાદ શરૂ થયો હતો. બીજી તરફ અમેરલીના દામનગર શહેર અને ગ્રામ્ય વિસ્તારમાં સતત એક કલાક ધોધમાર વરસાદ ખાબક્યો હતો. વલસાડમાં 48 કલાકમાં ભારે વરસાદની આગાહી હવામાન ખાતા દ્વારા કરવામાં આવી છે. મળતી માહિતી પ્રમાણે શનિવારે સાંજે ઘપમપુરમાં ત્રણ ઇંચ વરસાદ હતો. તો સુરતમાં ત્રણ કલાકમાં બે ઇંચ વરસાદ ખાબક્યો હોવાની માહિતી મળી હતી. આ સાથે આસપાસના વિસ્તારોમાં 1થી 2 ઇંચ વરસાદ પડ્યો હોવાની માહિતી મળી રહી છે. access_time 1:20 am IST

  • અમદાવાદ સેટેલાઇટ ગેંગરેપ કેસની તપાસ કરી રહેલી અમદાવાદ ક્રાઇમ બ્રાન્ચની ટીમે આરોપીઓની બ્રેઇન મેપિંગ માટે મેટ્રો કોર્ટમાં મંજૂરી માંગી હતી. જેથી શનિવારે મેટ્રો કોર્ટે આરોપીઓની બ્રેઇન મેપિંગ માટેની મંજૂરી આપી હતી. access_time 1:20 am IST

  • વિશ્વ હિંદુ પરિષદે ફરીથી એકવાર અયોધ્યામાં રામ મંદિર બનાવવાના મુદ્દા અંગે સરકાર પર દબાણ કરવાનું શરૂ કરી દીધુ છે. વિહિપે સરકારને રામજન્મભૂમિ-બાબરી મસ્જિદ વિવાદને ઉકેલવા માટે ઓગસ્ટ, 2018 સુધીનો સમય આપ્યો છે. જો આનો કોઈ ઉકેલ નહિ નીકળે તો વિહિપ આને મોટા નેતાઓ સામે લઈ જશે જેમાં સંગઠનના શક્તિશાળી પદાધિકારીઓ સાથે સાધુ-સંતો પણ શામેલ હશે. access_time 1:19 am IST