Gujarati News

અમદાવાદઃ દેશનો નવો હાઇપરસ્પેકટ્રલ ઇમેજીંગ સેટેલાઇટ (HySIS) 29 નવેમ્બરના રોજ પ્રક્ષેપિત કરાયો હતો. જેણે કામ કરવાનું શરૂ કરી દીધું છે અને તેણે જે પ્રથમ ફોટો મોકલ્યો છે તેમાં ગુજરાતના લખપત વિસ્તારના કેટલાક ભાગ જોવા મળી રહ્યા છે. ઈસરોએ જણાવ્યું કે, રાષ્ટ્રીય દૂર સંવેદી કેન્દ્ર (NRAC) પર હાઈપર સ્પેક્ટ્રલ ઈમેજિંગ સેટેલાઈટ દ્વારા પ્રાપ્ત કરવામાં આવેલા ફોટાઓનો ઉપયોગ કૃષિ, જમીન સર્વેક્ષણ અને પર્યાવરણની દેખરેખ માટે કરવામાં આવશે.

HySIS ઉપગ્રહનું નિર્માણ અંતરિક્ષમાંથી પૃથ્વી પર દેખરેખ માટે ઈસરો દ્વારા સંપૂર્ણ સ્વદેશી રીતે કરાયું છે. તેનો ઉદ્દેશ્ય પૃથ્વીની સપાટીની સાથે ઈલેક્ટ્રોમેગ્નિટિક સ્પેક્ટ્રમમાં ઈન્ફ્રારેડ અને શોર્ટ વેવ ઈન્ફ્રારેડ ફિલ્ડનું અધ્યયન કરવાનો છે. HySIS એક વિશેષ ચીપની મદદથી તૈયાર કરવામાં આવે છે જેને ટેક્નોલોજીની ભાષામાં ઓપ્ટિકલ ઈમેજિંગ ડિટેક્ટર એરે કહે છે. આ ઉપગ્રહથી ધરતીના ખૂણે ખૂણા પર નજર રાખવી સરળ બનશે, કારણ કે ધરતીથી લગભગ 630 કિમી દૂર અંતરિક્ષમાંથી રહીને ઉપગ્રહ પૃથ્વી પર હાજર વસ્તુઓના 55 વિભિન્ન રંગોની ઓળખ સરળતાથી કરી શકશે.

હાઈપર સ્પેક્ટ્રલ ઈમેજિંગ (HySIS)ની એક ખુબી એ છે કે તે ડિજિટલ ઈમેજિંગ અને સ્પેક્ટ્રોસ્કોપીની શક્તિને જોડે છે. HySIS ઈમેજિંગ અંતરિક્ષથી એક દ્રશ્યને દરેક પિક્સલના સ્પેક્ટ્રમને વાંચવા ઉપરાંત પૃથ્વીની વસ્તુઓ, સામગ્રી કે પ્રક્રિયાની અલગ ઓળખ પણ કરે છે. તેનાથી પર્યાવરણ સર્વેક્ષણ, પાક માટે ઉપયોગી જમીનના આકલન, તેલ અને ખનિજ પદાર્થોની ખાણોની શોધ સરળતાથી કરી શકાશે.

લખપતના કિલ્લો ગુજરાતના કચ્છ જિલ્લાના લખપત ખાતે આવેલ એક પુરાતન કિલ્લો છે. જે જમાદાર ફતેહ મહંમદે ઇ.સ. 1801માં બંધાવ્યો હતો. લખપતમાં તે સમયે બંદર ધમધમતું હતું આ કિલ્લો આજે પણ ભુતકાળના ભવ્ય ઇતિહાસની સાક્ષી પૂરતો અડીખમ ઊભો છે. કચ્છમાં 1819 અને 2001માં મોટા અને વિનાશક ભૂકંપ આવ્યા હતા, છતાં આ કિલ્લો અડીખમ છે.