Gujarati News

અમદાવાદ તા.૪: આ વર્ષે એપ્રિલમાં ઇ-વે બીલ બનાવવાનું ફરજીયાત બનાવાય પછી ગુજરાત સતત પ્રથમ સ્થાને રહ્યું હતું. પણ નવેમ્બરમાં ગુજરાતને પાછળ છોડીને મહારાષ્ટ્ર પ્રથમ સ્થાને પહોંચી ગયું છે. જો કે નિષ્ણાંતોના મતે આમ બનવાનું કારણ દિવાળીની રજાઓ છે.

રાજયના વાણિજય કર વિભાગ દ્વારા અપાયેલા આંકડા અનુસાર નવેમ્બરમાં ગુજરાતમાં ૨૬.૦૮ લાખ ઇ-વે બીલ બન્યા હતા જે મહારાષ્ટ્ર દ્વારા બનેલા ૨૬.૧૩ લાખની સરખામણીમાં ઓછા હતા. આંકડાઓ દ્વારા એ પણ જાણવા મળ્યું કે ઓકટોબરમાં ૪૧.૬૩ લાખ ઇ-વે બીલની સામે નવેમ્બરમાં ૩૭.૪ ટકાનો ઘટાડો નોંધાયો હતો.

ચેક પોસ્ટના જોઇન્ટ કમિશ્નર આર.આર. પટેલે કહયું કે આનું મુખ્ય કારણ ગુજરાતમાં દિવાળીની રજાઓ દરમ્યાન ધંધાર્થીઓ એક અઠવાડીયું બંધ રહેવાનું છે. આ ઉપરાંત મંદીનો માહોલ પણ આ ઘટાડામાં ભાગ ભજવી ગયો છે.(૧.૯)