Gujarati News

નવી દિલ્હીઃ છેલ્લા ઘણા દિવસથી બોલીવુડના દબંગ સુપરસ્ટાર સલમાન ખાનના ફેન્સ તેના નવા ગીતની આતુરતાપૂર્વક રાહ જોઈ રહ્યા છે. ગીતના ટીઝરે સોશિયલ મીડિયા પર ધૂમ મચાવી હતી. હવે આ ફુલ ગીત  'તેરે બિના' રિલીઝ કરી દેવામાં આવ્યું છે. ગીત આવવાની સાથે સોશિયલ મીડિયાની દુનિયામાં ધમાલ મચાવી રહ્યું છે. લોકોને સલમાન ખાન અને જેકલીન ફર્નાડીઝનો આ રોમેન્ટિક અવતાર ખુબ પસંદ આવી રહ્યો છે.

ગીતના રિલીઝની જાણકારી સલમાન ખાને પોતાના સોશિયલ મીડિયા ઇન્સ્ટાગ્રામ અને ટ્વીટર વોલ પર આપી છે. તેણે ગીતની યૂટ્યૂબ લીંક પણ શેર કરી છે. ગીત રિલીઝ થયાની 25 મિનિટમાં બે લાખ વ્યૂ મળી ચુક્યા છે. લૉકડાઉનમાં સલમાને તેના ફેન્સને આ ગીત દ્વારા મનોરંજન પૂરુ પાડ્યુ છે.

ગીત તેરે બિના સલમાન ખાન દ્વારા ડાયરેક્ટ અને તેના અવાજમાં ગાવામાં આવ્યુ છે અને ગીતને તેના મિત્ર અજય ભાટિયાએ કંપોઝ કર્યુ છે અને તેને શબ્બીર અહમદે લખ્યુ છે.

તમને જણાવી દઈએ કે સલમાન ખાન અને જેકલીન ફર્નાડીઝ  પર ફિલ્માવવામાં આવેલા આ લવ સોંગને તેના પનવેલ ફાર્મહાઉસમાં સરકાર દ્વારા જારી કરવામાં આવેલા તમામ દિશા-નિર્દેશો હેઠળ શૂટ કરવામાં આવ્યું છે. આ પ્રથમવાર છે જ્યારે બંન્ને પોતાની સુપરહિટ ફિલ્મ કિક બાદ એકસાથે ફરીથી સ્ક્રીન શેર કરતા જોવા મળી રહ્યાં છે. બંન્નેનો રોમેન્ટિક અંદાજ લોકોને પસંદ આવી રહ્યો છે.