Gujarati News

મુંબઇ, તા.૭: એકટર અક્ષય કુમારની નાગરિકતા પર દ્યણી વખત સવાલ ઊભા થયા છે. કેટલાંક સમય પહેલા એવી વાત જાણવા મળી હતી કે અક્ષય કુમારની પાસે કેનેડાની નાગરિકતા છે. ત્યારબાદ ટ્વિટર પર યૂઝર્સે અક્ષય કુમારને ટ્રોલ પણ કર્યો હતો. હવે અક્ષય કુમારે કહ્યું છે કે તેણે ભારતીય પાસપોર્ટ માટે અરજી કરી છે.

 દિલ્હીના એક કાર્યક્રમમાં અક્ષય કુમારે આ વાત જણાવી. તેણે કહ્યું કે મને ભારતીય પાસપોર્ટ ટૂંક સમયમાં મળી જશે. આ વર્ષની શરૂઆતમાં જયારે અક્ષય કુમારે લોકસભાની ચૂંટણીમાં મતદાન કર્યું નહોતું ત્યારે તે ટ્રોલનો શિકાર બન્યો હતો. તે અંગે સ્પષ્ટતા કરતા અક્ષય કુમારે જણાવ્યું હતું કે તેની પાસે ભારત નહીં પણ કેનેડાનો પાસપોર્ટ છે. માટે તે મત આપી શકયો નથી.

દિલ્હીના કાર્યક્રમમાં કેનેડિયન પાસપોર્ટની વાત કરતા અક્ષય કુમારે જણાવ્યું કે એક એવો સમય હતો કે જયારે મારી ૧૪ ફિલ્મો ફલોપ થઈ હતી. ત્યારે મને લાગી રહ્યું હતું કે મારે હવે કશું નવું કરવું પડશે. કેનેડામાં રહેતા મારા નજીકના મિત્રોએ મને કેનેડા આવવા માટે જણાવ્યું. મેં તૈયારી શરૂ કરી, કેનેડાનો પાસપોર્ટ લીધો કારણકે મને લાગતું હતું કે મારું કરિયર ખતમ થઈ ગયું છે. બોલિવૂડમાં કામ મળશે કે નહીં તે સવાલ મને સતાવી રહ્યો હતો. પછી ચમત્કાર થયો અને મારી ૧૫મી ફિલ્મ હિટ રહી. પછી હું ખૂબ આગળ વધ્યો અને કયારેય મારો પાસપોર્ટ રિપ્લેસ કરવાનું વિચાર્યું નહીં.

અક્ષય કુમારે વધુમાં જણાવ્યું કે હવે મેં ભારતીય પાસપોર્ટ માટે અરજી કરી છે. મારી પત્ની અને મારો પુત્ર ભારતીય છે. મારા પરિવારના દરેક લોકો ભારતીય છે. હું મારા સંપૂર્ણ ટેકસ ભારતમાં ભરું છું. મારું જીવન પણ ભારતમાં છે. હવે હું કોઈને કશું કહેવાની તક આપવા નથી માગતો માટે મેં ભારતીય પાસપોર્ટ માટે અરજી કરી છે.