Gujarati News

અમદાવાદ, તા.૧૨ : સાવકી માતા અને પિતા સાથે શેહરના પાલડી વિસ્તારમાં રહેતી ૧૯ વર્ષીય યુવતીને પોતાના સગા ફઈના દીકરા સાથે પ્રેમસંબંધ બંધાયો, અને જેમ કહેવાય છે કે પ્રેમ આંધળો હોય છે તેમ આ યુવતી પણ સમાજના તમામ બંધનો તોડીને પોતાના મનના માણીગર સાથે રહેવા માટે ઘર છોડીને ભાગી ગઈ હતી. જે બાદ યુવતી તેના પ્રેમી સાથે હિંમતનગરમાં ભાડે રહેતી હતી અને બંને લગ્ન કરવા માંગતા હતા. જોકે સાવકી માતાના ડરથી યુવતીએ ૧૮૧ મહિલા હેલ્પ લાઈનની મદદ લીધી હતી. જે બાદ તેને નારી ગૃહમાં મોકલવામાં આવી હતી.

ઘટનાની વિગત મુજબ યુવતીની માતા અગાઉ પ્રેમી સાથે ભાગી જતા તેના પિતાએ બીજા લગ્ન કર્યા હતા. પરંતુ બીજી મમ્મી અવાર નવાર યુવતીને હેરાન કરતી હતી. સાવકી માતાને પિતરાઈ ભાઈ સાથે યુવતીના અફેરની ખબર પડી જતા તે બંનેને લગ્ન નહીં કરવા દે તેમ કહીને ત્રાસ આપતી હતી. જેથી યુવતીને ઘરમાં રહેવું ન હોવાથી મહિલા હેલ્પલાઇન અભયમ ૧૮૧ની મદદ માંગી હતી. ૧૮૧ની ટીમે યુવતીનું કાઉન્સેલીંગ કરીને તેને નારી ગૃહમાં રહેવા માટે મોકલી આપી મામલો થાળે પાડ્યો હતો.

અભય મહિલા હેલ્પલાઈનને યુવતીએ કાઉન્સેલિંગ દરમિયાન જણાવ્યું હતું કે જ્યારે યુવતી ધોરણ-૪માં અભ્યાસ કરતી હતી ત્યારે તેની માતા બીજા યુવક સાથે ભાગી ગઈ હતી. જેથી યુવતીના પિતાએ નવા લગ્ન કર્યા હતા.

બાદમાં નવી મમ્મી અવાર નવાર હેરાન કરતી હતી. આ દરમિયાન ફઈ અને તેના દીકરા યુવતીને સતત મદદ કરતાં રહેતા હતા. ફઈના દીકરાએ જ યુવતીને નોકરી પણ અપાવી હતી. આ દરમિયાન બંને વચ્ચે મનમેળ થઈ જતા રોજબરોજ વાતો થવા લાગી અને બંને વચ્ચે પ્રેમ સબંધ બંધાયો હતો.

જોકે યુવકની ઉંમર પણ ૧૯ વર્ષની હોવાથી લગ્ન કરી શક્યા ન હતા જેથી લીવ ઈનમાં રહેવા લાગ્યા હતા. પરંતુ યુવતીની નવી મમ્મી અવાર નવાર હેરાન કરતી અને તારા લગ્ન નહીં કરવા દઉં તેમ કહીને ત્રાસ આપવા લાગી હતા. જેથી યુવતી તેના ઘરે રહેવા માંગતી ન હતી અને પોતે નારી ગૃહમાં રહેવા માટે અને નોકરી કરવા માટે અભયની ટીમને જણાવ્યું હતું તથા વધુમાં જણાવ્યું હતું કે, પોતે અને તેનો પ્રેમી ૨૧ વર્ષનો થઈ જાય તે પછી બંને એક બીજા સાથે લગ્ન કરી લેશે, જેથી તે નારી ગૃહમાં રહેવા માંગે છે. જો તે ઘરે રહેશે તો તેની નવી મમ્મી અવાર નવાર ત્રાસ આપીને લગ્ન નહીં કરાવે. આ સાંભળીને અભયની ટીમે યુવતીને સમજાવી હતી. જો કે યુવતીને નારી ગૃહમાં રહેવું હોય અને નોકરી કરવી હોવાથી અભયની ટીમે યુવતીને નારી ગૃહમાં મોકલી આપીને યુવતીની સમસ્યા દૂર કરી હતી.