Gujarati News

દુબઈ , તા.૩૦ : આ વર્ષે ફેબ્રુઆરીમાં જ્યારે ઈન્ડિયન પ્રીમિયર લીગની ૧૪મી સીઝન માટે હરાજી થઈ તો, છેલ્લું નામ માસ્ટર બ્લાસ્ટર સચિન તેંડુલકરના પુત્ર અર્જુન તેંડુલકરનું હતું. પહેલી વખત આઈપીએલ ઓક્શનમાં સામેલ થયેલા અર્જુનને મુંબઈ ઈન્ડિયન્સે તેની બેઝ પ્રાઈસ ૨૦ લાખ રૂપિયામાં ખરીદ્યો હતો.

લોકો અનુમાન લગાવી રહ્યા હતા કે, અર્જુન તેના પિતાની મેન્ટોરશિપમાં આઈપીએલ ડેબ્યુ કરશે, પરંતુ હવે તેનું કરિયર શરૂ થતા પહેલા જ અટકી ગયું છે. મળતી માહિતી મુજબ, મુંબઈ ઈન્ડિયન્સે અર્જુન તેંડુલકરના સ્થાને સિમરજીત સિંહને ટીમમાં સામેલ કરી લીધો છે. મુંબઈ ઈન્ડિયન્સના મીડિયા એનાઉન્સમેન્ટ મુજબ, મુંબઈ ઈન્ડિયન્સે આઈપીએલ ૨૦૨૧ના બાકી સત્ર માટે ઈજાગ્રસ્ત અર્જુન તેંડુલકરના સ્થાને સિમરજીત સિંહને પોતાની ટીમમાં સામેલ કર્યો છે.

હકીકતમાં, ડાબોડી યુવા પેસર અર્જુન ઈજાગ્રસ્ત છે. તાજેતરમાં જ સૈયદ મુશ્તાક અલી ટ્રોફીમાં મુંબઈ માટે ડેબ્યુ કર્યા પછી તેને આઈપીએલનો કોન્ટ્રાક્ટ મળ્યો હતો. અહેવાલ છે કે, રાઈટ આર્મ ફાસ્ટ બોલર સિમરજીતે આઈપીએલની ગાઈડલાઈન મુજબ આઈસોલેશન પીરિયડ પૂરો કર્યા પછી ટીમની સાથે પ્રેક્ટિસ શરૂ કરી દીધી છે.

અર્જુને મુંબઈ ઈન્ડિયન્સ માટે રમવાને પોતાનું સપનું જણાવ્યું હતું. એ વખતે તેણે કહ્યું હતું કે, પહેલા વાનખેડેમાં બોલ બોય. ગત સીઝનમાં સપોર્ટ બોલર અને હવે ટીમનો બોલર. આ શોટાઈમ છે અર્જુન. બાળપણથી જ હું મુંબઈ ઈન્ડિયન્સનો ઘણો મોટો પ્રશંસક રહ્યો છું. હું તે પછી કોચ, ટીમ માલિકો અને સપોર્ટ સ્ટાફનો મારામાં વિશ્વાસ રાખવા માટે આભાર માનું છું.

અર્જુને આ વર્ષે મુશ્તાક અલી ટી-૨૦ ટ્રોફીમાં ડેબ્યુ કર્યું હતું. પછી અર્જુને એમઆઈજી ક્રિકેટ ક્લબ તરફથી રમતા ૩૧ દડામાં અણનમ ૭૭ રન બનાવ્યા હતા. તે સાથે જ તેણે ૩ વિકેટ ઝડપી હતી.

મુંબઈ ઈન્ડિયન્સ ટીમઃ રોહિત શર્મા (કેપ્ટન), ક્વિંટન ડિકોક, ઈશાન કિશન, સૂર્યકુમાર યાદવ, આદિત્ય તારે, અનમોલપ્રીત સિંહ, ક્રિસ ગેલ, સૌરભ તિવારી, અનુકૂળ રોય, સિમરજીત સિંહ, હાર્દિક પંડ્યા, કૃણાલ પંડ્યા, જેમ્સ નીશામ, જયંત યાદવ, કીરોન પોલાર્ડ, માર્કો જાનસેન, યુદ્ધવીર સિંહ, એડમ મિલ્ને, ધવલ કુલકર્ણી, જસપ્રીત બુમરાહ, મોહસિન ખાન, નાથન કૂલ્ટર-નાઈલ, પીયૂષ ચાવલા, રાહુલ ચહર, ટ્રેન્ટ બોલ્ટ.