Gujarati News

નવી દિલ્હી: વર્ષની બીજી ગ્રાન્ડસ્લેમ ફ્રેન્ચ ઓપનના બીજા દિવસે પૂર્વ ટોચના ક્રમાંકિત નોવાક યોકોવિચ, ડોમનિક થિઅમ, જાઇલ્સ સિમોને બીજા રાઉન્ડમાં આગેકૂચ કરી છે જ્યારે ૨૩મા ક્રમાંકિત સ્ટેન વાવરિન્કાનો પ્રથમ રાઉન્ડમાં જ પરાજય થતાં મેજર અપસેટ સર્જાયો હતો. ૨૦મા ક્રમાંકિત યોકોવિચે પ્રથમ રાઉન્ડમાં બ્રાઝિલના સિલ્વાને ૬-૩, ૬-૪, ૬-૪થી પરાજય આપ્યો હતો. પ્રથમ બંને સેટમાં યોકોવિચ એક તબક્કે ૦-૨થી પાછળ હતો. ૩૧ વર્ષીય યોકોવિચ ૨૦૧૬ બાદ એકપણ ગ્રાન્ડસ્લેમ જીતી શક્યો નથી. ૨૦૧૫માં ફ્રેન્ચ ઓપનમાં યોકોવિચને હરાવીને ચેમ્પિયન બનેલા સ્ટેન વાવરિન્કાનો આ વખતે પ્રથમ રાઉન્ડમાં ગુલેર્મો ગાર્સિયા લોપેઝ સામે ૬-૨ ૩-૬ ૪-૬ ૭-૬ (૭-૫) ૬-૩થી પરાજય થયો હતો. સાતમા ક્રમાંકિત ડોમિનિક થિએમને વિજય મેળવવા ખાસ સમસ્યા નડી નહોતી અને તેણે ઇવાશ્કાને ૬-૨, ૬-૪, ૬-૧થી પરાજય આપ્યો હતો. અન્ય મુકાબલામાં જાઇલ્સ સિમોને બેસિલાશિવિલીને ૬-૪, ૬-૦, ૬-૭ (૪-૭), ૬-૪થી પરાજય આપીને બીજા રાઉન્ડમાં આગેકૂચ કરી હતી. વિમેન્સ સિંગલ્સમાં બીજી ક્રમાંકિત વોઝનિયાકીનો કોલિન્સ સામે ૭-૬ (૭-૨), ૬-૧થી, અઝારેન્કાનો સિનિઆકોવા સામે ૭-૫, ૭-૫થી પરાજય થતાં અપસેટ સર્જાયો હતો. અન્ય મુકાબલામાં ક્વિટોવાએ સેપડે સામે ૩-૬, ૬-૧, ૭-૫થી, પેટ્કોવિકે મ્લાડેનોવિક સામે ૭-૬ (૧૨-૧૦), ૬-૨થી, ગાર્સિયા પેરેઝે જાકુપ્વોક સામે ૬-૩, ૬-૪થી વિજય મેળવીને બીજા રાઉન્ડમાં પ્રવેશ કર્યો હતો.