Gujarati News

મુંબઈ: IPL 2024 માં, મુંબઈ ઈન્ડિયન્સે અહીં મહારાજા યાદવેન્દ્ર સિંહ ક્રિકેટ સ્ટેડિયમ ખાતે હૃદય ધબકતી મેચમાં પંજાબને નવ રને હરાવ્યું હતું.જીતવા માટે 193 રનના લક્ષ્યાંકનો પીછો કરતા પંજાબને છેલ્લી ઓવરમાં જીતવા માટે 12 રનની જરૂર હતી જ્યારે મુંબઈને એક વિકેટની જરૂર હતી. આકાશ મધવાલે વાઈડ સાથે શરૂઆત કરી અને યજમાન ટીમને એક રનની ભેટ આપી. રબાડાએ આગળનો બોલ પોઈન્ટથી આગળ રમ્યો અને બે રન લેવાનો પ્રયાસ કર્યો, પરંતુ વિકેટકીપર ઈશાન કિશને મોહમ્મદ નબીના થ્રો પર બેઈલ ઉડાવી દીધા. મુંબઈએ પાંચ બોલ બાકી રહેતા નવ રનથી મેચ જીતી લીધી હતી, મુંબઈ માટે બુમરાહે ચાર ઓવરમાં 21 રન આપીને ત્રણ વિકેટ લીધી હતી. ગેરાલ્ડ કોએત્ઝીએ પણ ચાર ઓવરના ક્વોટામાં 32 રન આપીને ત્રણ વિકેટ ઝડપી હતી. શ્રેયસ ગોપાલ, હાર્દિક પંડ્યા અને માધવાલે એક-એક વિકેટ લીધી હતી. પંજાબની શરૂઆત સારી રહી ન હતી અને તેના છ ખેલાડીઓ 9.2 ઓવરમાં 77 રન પર પેવેલિયન પરત ફર્યા હતા. પરંતુ આઠમા નંબરે આવેલા આશુતોષ શર્માએ શાનદાર બેટિંગ કરી હતી. તેણે માત્ર 28 બોલમાં સાત છગ્ગા અને બે ચોગ્ગાની મદદથી 61 રન બનાવ્યા હતા. એક સમયે એવું લાગતું હતું કે મેચ મુંબઈના હાથમાંથી નીકળી ગઈ છે. પરંતુ કોએત્ઝીએ 18મી ઓવરના પહેલા બોલ પર શર્માને આઉટ કરીને મુંબઈને મેચમાં પરત લાવ્યું હતું. શશાંક સિંહે 25 બોલમાં 41 અને હરપ્રીત બ્રારે 21 રન બનાવ્યા હતા.